Qatar premer-mınıstri Muhammed bın Abdýlrahman ál-Tanı baspasóz jıynynda Izraıl men HAMAS Gaza sektoryndaǵy atysty ýaqytsha toqtatýǵa keliskenin rastady. Bul týraly BBC habarlady.

Qatar eki el arasyndaǵy kelissózderde basty deldal boldy. Ál-Tanıdiń aıtýynsha, kelisim 19 qańtarda kúshine enedi.

Atysty toqtatýdyń birinshi kezeńi alty aptaǵa sozylady. Osy ýaqytta Gaza sektoryna gýmanıtarlyq kómek jiberilip, Izraıl áskerleri sektordan birtindep shyǵýy kerek.

Qatar premer-mınıstri HAMAS óz tarapynan kepilge alynǵan 33 adamdy bosatatynyn habarlady. Al Izraıl túrmeden HAMAS-qa qatysy bar jáne ızraıldikterge shabýyl jasady dep sottalǵan tutqyndardy qamaýdan shyǵarady. 

AQSH prezıdenti Djo Baıden bul kelisimdi amerıkalyq dıplomatıanyń tabandy ári qajyrly eńbeginiń nátıjesi dep málimdedi.

2023 jylǵy 7 qazanda Hamas Izraıldiń ońtústigine shabýyl jasaǵanyn eske salaıyq. Myńdaǵan adam qaıtys bolyp, eki júzden asa adam (olardyń arasynda ártúrli memleketterdiń azamattary bar) tutqynǵa alyndy. Izraıl tarapy kepilge alynǵan 94 adamnyń 60-y ǵana tiri dep sanaıdy. Al Gazanyń densaýlyq saqtaý mınıstrliginiń dereginshe, 46 myńnan astam palestınalyq qaza tapqan.