Energetıka mınıstri Almasadam Sátqalıev Reseı men Ózbekstannan elektr energıasyn satyp alýǵa qatysty túsinik berdi.

— Biz Reseıden elektr energıasyn eki jaǵdaıda satyp alamyz, ıaǵnı tapshylyqty jabý úshin jáne josparlanbaǵan aǵyn jaǵdaıynda. Josparlanbaǵan aǵyn jaǵdaıy elektr júıesiniń jumysynda aýytqý bolǵanda týyndaıdy. Bul jaǵdaıda ártúrli tólem rejımi qarastyrylǵan. Reseımen kelisim aıasynda 150 megavattqa deıin elektr energıasyn óz qunymen satyp alamyz. Eger aýytqý 150 megavattan assa, dıspecherleý jáne «Rossetı» jelileri boıynsha qosymsha tranzıt tólenedi. Sondaı-aq, energıa tapshylyǵyn jabý úshin naryq sýbektileri júzege asyratyn josparly aǵyndar bar. Shartqa baılanysty baǵa ártúrli. Eger biz elektr energıasyn Reseı Federasıasynan belgilengen dıapazonda satyp alsaq, onyń ortasha quny 1 kılovatt saǵatyna shamamen 8 teńgeni quraıdy. Eger biz osy dıapazonnan asyp ketetin bolsaq, onda baǵa kılovatt saǵatyna 23,8 teńgege deıin ósedi, — dep túsindirdi Almasadam Sátqalıev Májilistiń jalpy otyrysynda.

Mınıstrdiń aıtýynsha, Qazaqstan elektr energıasyn kóp tutynatyn ýaqytta kórshiles elderden qymbat baǵamen satyp alýǵa májbúr. 

— Ótken jyly ishinara Ózbekstannan satyp aldyq, sonymen qatar Reseıden de satyp alamyz, ortasha baǵasy, ıaǵnı kılovaty saǵatyna 48 teńgeni quraıdy. Biraq bul tarıftiń qymbattaýyna ákelmeıdi. Nege? Sebebi bul májbúrli satyp alý, onyń basqa joly joq. Áıtpese, ishki tutynýshylarǵa shekteý qoıýǵa alyp keler edi, — dep tolyqtyrdy vedomstvo basshysy.