Áskerı qolbasshylyq Sırıa konstıtýsıasynyń toqtaǵanyn jáne ýaqytsha zań shyǵarýshy keńes qurý úshin ókilettikterdiń Sharaǵa berilgenin jarıalady. Sondaı-aq parlament tarap, eldi ondaǵan jyldar boıy basqarǵan “Baas” partıasy joıyldy. 

“Ótpeli kezeńde memlekettik qurylymdardy qaıta qurý, "ádilet arqyly azamattyq beıbitshilikti" qamtamasyz etý jáne Asad rejımi qulaǵannan keıin kek alý áreketteriniń aldyn alýǵa basymdyq beriledi. Tórt jyl ishinde ulttyq konferensıa ótkizip, ınklúzıvti úkimet jasaqtap, saılaý uıymdastyrýǵa ýáde beremin”, – dedi jańa prezıdent.

Ahmed ash-SHaraa bılik vakýmyn zańdy jolmen toltyrý basty mindet ekenin atap ótti. Ol memlekettik ınstıtýttardyń, sonyń ishinde ásker men qaýipsizdik organdarynyń jumysyn qalpyna keltirýge, sondaı-aq saıası reformalardy bastaýǵa nıetti.

Katar bıliktiń aýysýyn quptap, oǵan "konsensýs pen birlikke jasalǵan qadam" dep baǵa berdi. Alaıda sarapshylar buǵan kúmánmen qaraıdy. London ekonomıka mektebiniń qyzmetkeri Favaz Gerges Sharaa men onyń jaqtastary bir partıaly ıslamshyl bılik ornatýdy kózdeıdi dep sanaıdy. Karnegı Taıaý Shyǵys ortalyǵynyń sarapshysy Mohanad Heıdj Alı jańa ákimshilikten Sırıanyń mádenı jáne dinı ártúrliligi baıqalmaıdy dep esepteıdi.