2024 jyldyń qyrkúıek aıyndaǵy málimetke sáıkes, el ekonomıkasynda eńbekke jaramdy jastan asqan 298,5 myń qazaqstandyq jumys istegen. Bul 2022 jylmen salystyrǵanda 92,7 myń adamǵa kóp. Mundaı derekterdi Ulttyq statısıka búrosy (USB) usynyp otyr.  

Zeınetkerler negizinen aýyl sharýashylyǵynda (39,9%), saýda salasynda (20%) jáne bilim berý men densaýlyq saqtaý salasynda (16,2%) jumys isteıdi.  

Sońǵy 2 jylda barlyq salada egde jastaǵy qyzmetkerlerdiń sany artqan. Ásirese qurylys, memlekettik basqarý jáne qarjy sektorynda jumys isteıtin zeınetkerler sany 3 ese kóbeıgen, al kólik, logıstıka, saýda jáne áleýmettik salalarda bul kórsetkish 2 ese ósken.  

Jumys isteıtin zeınetkerler arasynda eń úlken topty zeınetke endi shyqqandar (65 jasqa tolmaǵandar) quraıdy. Al eń az sanatqa 85 jastan asqan azamattar jatady. Bir qyzyǵy, 2023 jyly 85 jastan asqan 700-den astam adam eńbek etken. Al 3 jyl buryn bul jasta jumys isteıtinder múlde bolmaǵan.

Qazaqstandyq zeınetkerlerdiń kópshiligi jumysyn jastarǵa tájirıbe berý úshin jalǵastyrady degen boljamdy tekserý úshin olardyń qandaı qyzmet atqaratynyn qarastyraıyq. Ulttyq statısıka búrosynyń málimetine sáıkes, ótken jyldyń qyrkúıek aıyndaǵy esep boıynsha 65 jastan asqan jumys isteıtin zeınetkerlerdiń 59,1%-y (69,3 myń adam) biliktiligi joq jumysshylar sanatyna jatqyzylǵan. Olardyń basym bóligi fermerlik sharýashylyqtarda – malshylar, shopandar, saýynshylar jáne t.b. retinde eńbek etken. Sonymen qatar 7,6 myń zeınetker eden jýýshy nemese basqa da qyzmet kórsetý jumystaryn atqarǵan. Bar bolǵany eki jyl ishinde mundaı qyzmetkerlerdiń sany 22 ese ósip, 339 adamnan 7,6 myń adamǵa jetti. 65 jastan asqan kóshe saýdagerleriniń sany da 13 ese kóbeıip, 395 adamnan 5,2 myń adamǵa jetti. Al biliktiligi joq qoqys jınaýshylardyń sany 79,1%-ǵa ósip, 3,7 myń adamdy qurady. Azyq-túlik pen dári-dármekke aqsha jetispeýi sıaqty qıyndyqtardan basqa, osynshama jastaǵy azamattardy qyzmetshi nemese tazalyqshy bolýǵa ıtermelegen qandaı sebepter bar? - deıdi ranking.kz sarapshylary.