Agroónerkásiptik keshen ekonomıkalyq ósýdiń negizgi qozǵaýshy kúshteriniń birine aınalýy tıis. Bul bıznes úshin de, memleket úshin de basymdyq bolyp tabylady. Bul týraly Aýyl sharýashylyǵy qyzmetkerleri forýmynda memleket basshysy Qasym-Jomart Toqaev málimdegen edi.

«Eń aldymen, bul azyq-túlik qaýipsizdigin qamtamasyz etý turǵysynan mańyzdy. Aýyl turǵyndarynyń ómiri men ál-aýqaty da salanyń jaı-kúıine tikeleı baılanysty», - dep atap ótti Memleket basshysy.

Abaı oblysynda agroónerkásiptik keshendi damytý jalǵasýda. 2024 jyly aýyl sharýashylyǵy daqyldarynyń egis alqaby 760,2 myń ga qurady. Buǵan sý únemdeý tehnologıalaryn ártaraptandyrý men engizýdiń nátıjesinde qol jetti. Atap aıtqanda, jemshóp daqyldarynyń aýdany 17,1 myń gektarǵa, kartop – 2,3 myń gektarǵa ulǵaıtyldy.

Dándi jáne maıly daqyldardyń ónimdiligi gektaryna 12-den 15 sentnerge deıin ósti. 2024 jyly sýarmaly jerdiń kólemi 30,1 myń ga, onyń ishinde 13,8 myń ga jańbyrlatyp jáne tamshylatyp sýarýdy paıdalandy. Bul jemshóp kólemin arttyryp qana qoımaı, mal sharýashylyǵynyń damýyna da yqpal etti. 

Ótken jyly oblysta mal basy aıtarlyqtaı ósti: iri qara mal – 42,1%, qoı – 21,4%, eshki-40,7% - ǵa artty. Jylqy sany burynǵy deńgeıde qaldy-350 myń bas. 

Mal sharýashylyǵy ónimderiniń (et ónimderi) ónimdiliginde oń dınamıka baıqalady. 2024 jyly sıyr eti 1,1%, qus eti 1,1%, sút 2,5%, taýyq jumyrtqasy 3,1%-ǵa ósti.

Óńirde kókónis ónimderin saqtaý úshin jalpy syıymdylyǵy 51,8 myń tonnalyq 13 qoıma jumys isteıdi. Bul jergilikti aýyl sharýashylyǵy óndirýshileriniń qajettilikterin óteıdi. 

«2024 jyly agroónerkásiptik keshenniń negizgi kapıtalyna ınvestısıalar tartý josparly kórsetkishterden asyp tústi. Boljam boıynsha 40,5 mlrd teńge, is júzinde 43,2 mlrd teńge salyndy. 2025 jyly keminde 48 mlrd teńge tartý kózdelgen.  Aımaqta 2 et kombınaty, 1 etti baǵyttaǵy taýyq fabrıkasy men 10 myń basqa arnalǵan  óndiristik bordaqylaý alańyn salý men 5,4 myń gektar egistik alqapqa sýarý júıesi ornatylmaq. Agrarlyq sektordy qoldaýǵa memleket 14,4 mlrd teńge sýbsıdıa bóldi. Importty almastyrý boıynsha jumys jalǵasýda. Óńir ózin negizgi azyq-túlik taýarlarynyń 14 túrimen qamtamasyz etedi», - dedi oblys ákiminiń orynbasary Qýanysh Súleımenov.

2024 jyly óńirde 76,7 myń tonna un, 2,5 myń tonna makaron ónimderi, 122,8 myń tonna tazartylmaǵan kúnbaǵys maıy, 4,6 myń tonna óńdelgen sút, 320 tonna irimshik pen súzbe, 179 tonna sary maı jáne 1 254 tonna shujyq ónimderi óndirildi. 

Mańyzdy jobalardyń biri - 2025 jyly qýattylyǵy jylyna 72 myń tonna bolatyn «Qazaq Astyq Group» JSHS kásipornynda tazartylǵan ósimdik maıyn óndirý jelisin iske qosý. Jobanyń ınvestısıasy 7,2 mlrd teńgeni quraıdy. 

Ákim orynbasary bul sharalardyń barlyǵy óńirdiń azyq-túlik qaýipsizdigin nyǵaıtýǵa, aýyl sharýashylyǵyn damytýǵa jáne ımporttyq taýarlarǵa táýeldilikti azaıtýǵa baǵyttalǵanyn aıtty.