AQSH prezıdenti Donald Tramp Ýkraına basshysy Vladımır Zelenskııdi «dıktator» dep ataǵan sózderinen bas tartty.

Men ondaı aıttym ba? Buǵan sene almaı otyrmyn. Kelesi suraq, – dep jaýap berdi jýrnalısiń suraǵyna AQSH prezıdenti.

Buǵan deıin, ıaǵnı 19 aqpanda Tramp Truth Social platformasyndaǵy jazbasynda Ýkraına prezıdentin «saılaýsyz dıktator» dep atady. Óıtkeni ol óz elinde saılaý ótkizýden bas tartyp otyr-mys.

Zelenskııge asyǵý kerek, áıtpese onyń eli qalmaıdy, – dep qosty amerıkalyq lıder. 

Sol kúni Donald Tramp bul sózin Maıamıdegi mıtıńte taǵy qaıtalady.

24 aqpanda AQSH prezıdentinen "Vladımır Pýtındi dıktator dep ataı alasyz ba?" dep suraǵanda, ol "Men mundaı sózderdi oılanbaı qoldanbaımyn" dep, Reseı basshysyna eshteńe demedi.

Aq úı basshysynyń málimdemelerin Ýkraına da, sheteldik saıasatkerler de synǵa aldy. Atap aıtqanda, Germanıa kansleri Olaf Shols AQSH prezıdentiniń sózderin «qate ári qaýipti» dep atady. 

 Vladımır Zelenskıı – Ýkraına memleketiniń zańdy túrde saılanǵan basshysy. Soǵys jaǵdaıynda laıyqty saılaý ótkizý múmkin emes ekeni Ýkraına Konstıtýsıasy men saılaý zańdaryna sáıkes keledi. Eshkim buǵan qarsy ýáj aıta almaıdy, – dep atap ótti Germanıa úkimetiniń basshysy.

Eýrokomıssıa Tramptyń Zelenskııge baǵyttalǵan sózdik shabýylyna qatysty «Bul máselede bizdiń ustanymymyz aıqyn jáne naqty: prezıdent Zelenskıı erkin, ádil jáne demokratıalyq saılaýda zańdy túrde saılanǵan. Ýkraına – demokratıaly el, al Pýtın bıligindegi Reseı – olaı emes», – dep málimdedi. 

BUU da Vladımır Zelenskııdiń «zańdy túrde ótken saılaý nátıjesinde óz qyzmetin atqaryp otyrǵanyn» rastady.