Májilis depýtaty Abzal Quspan Premer-mınıstr Oljas Bektenovke joldaǵan depýtattyq saýalynda kıikterge qatysty másele kóterdi.

Depýtattyń sózinshe, tabıǵı tepe-teńdikti saqtaý jolynda Úkimettiń áreketsizdigi aýyl sharýashylyǵyna orny tolmas zıan keltirip otyr.

Memleket basshysy Ulttyq quryltaıda kıik popýlásıasynyń kúrt ósýi aýyl sharýashylyǵyna keri áser etip, ekojúıege artyq salmaq túsirip jatqanyn atap ótti. Bul másele bir kúnde paıda bolǵan joq – aımaqtardan atqarýshy bılikke joldanǵan júzdegen ótinish pen talap-aryz Úkimet tarapynan jyldar boıy eleýsiz qalyp keledi.

2023 jyly BUU janyndaǵy Jabaıy janýarlardyń qonys aýdaratyn túrleri komıtetiniń (CMS) sarapshylary arnaıy kelip, Batys Qazaqstan oblysynyń aýdandaryn aralady. Zertteý nátıjesinde QR Úkimetine naqty usynystar jasaldy, olardyń bastysy – jergilikti halyq pen kıik arasyndaǵy qaqtyǵysty sheshý. Alaıda, Úkimet kúnibúgin bul usynystardy oryndaý boıynsha naqty bir is-áreketke kóshken joq, - dedi Abzal Quspan.

Osyǵan baılanysty depýtat Úkimetten talap etti:

1. Kıik popýlásıasyn retteý boıynsha naqty sharalar qabyldaýdy, atap aıtqanda:

• Bıyl kıik sanyn retteý jumystaryn júrgizý týraly resmı sheshim qabyldap, onyń ádisteri men ekologıalyq negizdemesin jarıalaýdy;

• Kıik popýlásıasyn retteý boıynsha jaýapty bir memlekettik organdy belgileýdi jáne onyń naqty is-sharalaryn bekitýdi.

Osy jerde aıta ketetin bir másele – Keńes Úkimeti kezinde kıiktiń eti de, terisi de paıdaǵa asty, olardyń sany sońǵy kezdegideı kúrt ózgeristerge ushyraǵan joq, onyń basty sebebi – kıik úshin jaýapty naqty bir mekeme bolǵandyǵynda. Kıik ónimin halyq sharýashylyǵyna paıdalanylýyn, azaıyp ketse de, kóbeıip ketse de jaýap beretin bir ǵana mekeme edi. Al qazirshe? Kıikti qorǵaıtyn mekeme óz aldyna, al atýǵa, lısenzıasy bar kez-kelgen ańshyny quqyly qylyp qoıdyńyzdar. Odan qala berdi, etin, terisin paıdalanylýyn nemese ǵalymdarmen jumysty úılestirip otyratyn jaýapty naqty bir uıym, mekeme joq, - deıdi májilismen.