Densaýlyq saqtaý mınıstri Aqmaral Álnazarova jedel járdem qyzmetin jergilikti atqarýshy organdardyń quzyretine berý usynysy qarastyrylyp jatqanyn aıtty.

Aqmaral Álnazarova májiliste MÁMS júıesi týraly zań jobasyn tanystyrý barysynda jańa usynys qarastyrylyp jatqanyn sóz etti.

"Jedel járdemge baılanysty problema joq emes, bar, osy oraıda kelesi jyly barlyq oblys jergilikti búdjet esebinen tıisti qarajat bólip, jedel járdem kóligi máselesin sheshýdi josparlap otyr. Bizde taǵy bir usynys bar, jedel járdem qyzmetiniń tıisti tarıfin belgilep, jergilikti atqarýshy organdarǵa berý máselesi qaralýda", — dedi májilis depýtattarynyń saýalyna jaýap berý kezinde Aqmaral Álnazarova.

Odan ári mınıstr jedel járdem qyzmetin óńir ákimdikteriniń quzyretine berýdiń sebebin atady.

"Kólik, ınfraqurylym, avtokólikter turaǵy máselelerin sheshý, brıgadalardyń sanyn kóbeıtý jergilikti atqarýshy organdardyń quzyretinde bolýy kerek. Qarajat bólý, basqa da máseleler tez arada sheshiledi", — deıdi ol.

Buǵan deıin Aqmaral Álnazarova 2027 jyldan bastap jedel járdem qyzmeti boıynsha jańa norma engiziletinin málimdegen edi.

Odan bólek Densaýlyq saqtaý mınıstri medısına salasyna ınvestısıa quıǵysy keletin kásipkerlerge jol ashyq ekenin jetkizdi.