Shymkent qalasyndaǵy «Jastar resýrstyq ortalyǵynda» ishki tártip pen qyzmetkerlerge kórsetilip jatqan qysymǵa qatysty shý shyqty. Iaǵnı, ortalyq qyzmetkerleriniń birnesheýi anonımdi túrde shaǵym túsirip, basshylyq tarapynan áleýmettik jelilerdegi belsendiligine baılanysty qysymǵa ushyrap jatqandaryn aıtady.

Bul týraly alǵash bolyp jergilikti bloger Azat Dıdarbek óziniń áleýmettik jelidegi paraqshasynda jazdy. Onyń málimetinshe, ortalyq basshylyǵy qyzmetkerlerden mekemeniń paraqshalaryndaǵy jazbalarǵa mindetti túrde laık basyp, pikir qaldyryp otyrýdy talap etken. Bul talap oryndalmaǵan jaǵdaıda eskertý jasalyp, qyzmetkerdiń esimi arnaıy tizimge ilinetin bolǵan.

— Keıbir qyzmetkerler áleýmettik jelidegi belsendiligi úshin sóz estip, tipti «eskertý» alǵan. Júıkesi syr bergender bar. Búgin ǵana ortalyq qyzmetkerleriniń biri qysymǵa shydaı almaı, esinen tanyp qaldy. Jedel járdem shaqyrylyp, alǵashqy medısınalyq kómek kórsetildi, — deıdi Azat Dıdarbek.

Onyń aıtýynsha, mekeme basshylyǵy jastar saıasatyn júrgizýdiń ornyna, ujym ishindegi tártipti áleýmettik jelidegi belsendilik arqyly baqylaýǵa tyrysýda. Bul jaǵdaı «Jastar resýrstyq ortalyǵy» syndy qoǵamdyq mańyzy bar mekemeniń bedeline nuqsan keltirýde.

Resmı pikir

Atalǵan jaǵdaıǵa qatysty Shymkent qalalyq ishki saıasat jáne jastar isteri jónindegi basqarmasynyń basshysy Aıgerim Jumaǵulova túsinikteme berdi. Ol bul máseleden tolyq habardar ekenin málimdedi.

— Alańdap, silteme jiberip otyrǵandaryńyzǵa rahmet. Biraq ári qaraı jiberýdiń qajeti joq. Men jaǵdaıdyń alǵashqy jarıalanýynan bastap habardarmyn. Ózime jumys josparyn belgiledim. Jaǵdaı boıynsha sheshim ádiletti jáne obektıvti túrde qabyldanady, — dedi basqarma basshysy.

Qazirgi ýaqytta oqıǵaǵa qatysty qosymsha málimetter anyqtalyp jatyr. Qyzmetkerler quqyǵynyń buzylý derekteri rastalǵan jaǵdaıda, tıisti sharalar qabyldanýy múmkin.