Almaty oblysy ákimdiginiń ókilderi men Ońtústik Koreıanyń RETD CO., LTD kompanıasy delegasıasy Almaty men Qonaev qalalaryn jalǵaıtyn jeńil relsti kólik (LRT) jelisi jobasyn talqylady. Joba zamanaýı magnıtti ilinis (maglev) tehnologıasyn qoldanýdy kózdeıdi.

Kezdesýde Almaty oblysy ákiminiń orynbasary Rýstam Isataev kólik ınfraqurylymyn damytýdyń strategıalyq mańyzyna toqtalyp, óńirdiń ınvestısıalyq áleýeti týraly aıtty.

– Almaty oblysy – ınvestısıalyq jáne ınfraqurylymdyq áleýeti joǵary, qarqyndy damyp kele jatqan óńir. Biz kólik qoljetimdiligin arttyrýǵa jáne turǵyndardyń ómir sapasyn jaqsartýǵa basymdyq beremiz. Maglev tehnologıasyn qoldanatyn LRT jobasy – osy baǵyttaǵy mańyzdy qadamdardyń biri, – dedi Rýstam Isataev.

Kezdesýge qatysqan RETD CO., LTD kompanıasynyń atqarýshy dırektory Lı Chan Ýk óz sózinde maglev tehnologıasynyń artyqshylyqtary men kompanıanyń Azıa elderindegi uqsas jobalardaǵy tájirıbesimen bólisti.

– Bizdiń tájirıbemiz ben tehnologıamyz Qazaqstan úshin paıdaly bolady dep senemiz. Maglev – bul bolashaqtyń kóligi, jáne biz Almaty oblysynyń aýqymdy damýyna úles qosýǵa daıynbyz, – dedi Lı Chan Ýk.

Maglev (magnıttik levıtasıa) tehnologıasy arqyly qozǵalatyn poıyzdar relske tımeı, aýada "qalqyp" júretindikten, joǵary jyldamdyq pen únsiz qozǵalys sekildi birqatar artyqshylyqqa ıe. Sondaı-aq, bul júıe ekologıalyq taza kólik retinde tanylyp otyr.

Aldaǵy ýaqytta taraptar jobany naqtylaý, tehnıkalyq-ekonomıkalyq negizdeme ázirleý jáne ınvestısıalyq tetikterdi pysyqtaý boıynsha birlesken jumysty jalǵastyrmaq.