Aqtóbe oblysynda 200 mıllıon teńgeden astam qarjy bólingen saıabaq qurylysy bes jyldan beri aıaqtalmaı keledi. Joba bastapqyda bir jylda aıaqtalady dep josparlanǵan bolatyn. Alaıda qarjylandyrýdyń úzilip, turaqsyz júrgizilýi qurylys jumystarynyń keshigýine sebep bolǵan.
Qandyaǵash qalasynda bes jyl buryn qurylysy bastalǵan saıabaq áli kúnge deıin tolyq paıdalanýǵa berilmegen. 234 mıllıon teńge bólingen joba aıaqtalsa da, jaǵdaıy múshkil. Qazir nysannan kóńil jubatatyn eshteńe qalmaǵan: synǵan oryndyqtar, kúıregen sport alańy, janbaǵan shamdar men kútim kórmegen kógaldar.
4 gektar aýmaqta ornalasqan saıabaqta sport alańy, kópirler, demalys oryndary bolýy tıis edi. Biraq basketbol alańynda qursaýlar joq, stadıon qaqpalarynyń torlary jyrtylǵan, al betony mújilip ketken. Kóshelerge ornatylǵan shamdar alǵash ornatylǵan kúnnen beri jumys istemeıdi.
“Keshke kelýge qorqamyz”
Jergilikti turǵyn Gúlmıra Ótenıazova saıabaqtyń qaraýsyz qalǵanyn aıtyp qynjylady:
“Jaryq joq, barlyq shamy synǵan. Men keshke qydyrǵym keledi, biraq bul jer óte qarańǵy. Al jazda kúnnen qorǵanatyn jer joq. Kóshetterdiń bári qýrap qaldy. Olar sýarylmasa kerek. Munda kim keledi?”
2020 jyly paıdalanýǵa berilýi tıis nysan bes jylda áreń aıaqtalyp, ótken jyly kemshilikterine qaramastan sheneýnikter tarapynan qabyldanyp ketken. Qala ákimi Qazbek Aqqaıyr jóndeý jumystary bastalatynyn aıtty:
“Jol tóseıtin tastardy jartylaı aýystyramyz. Keıbir jerlerde onyń ústinen kólikter júrip qulaǵan. Merdiger saıabaqqa kire beristegi synǵan abajýrlar men granıt taqtalardy óz qarajatyna aýystyrady. Biz kompanıaǵa hat joldap, jóndeýge bir aı ýaqyt berdik”.
"Máńgilik alaý" – tek aty bar
Saıabaqtyń qaq ortasyna ornatylǵan "Máńgilik alaý" da turǵyndardyń kóńilinen shyqpaǵan. Sebebi ol eshqashan janbaıdy. Bul jaǵdaıdy sheneýnikter “sırek jaǵylatyn sımvoldyq element” dep túsindirýge tyrysty.
Alaıda bul jaýaptar jurtshylyqtyń narazylyǵyn basa alǵan joq. Áleýmettik jelide de, qala turǵyndary arasynda da 234 mıllıon teńgege osyndaı sapasyz jumys jasalǵany qyzý talqylanýda. Sheneýnikter aldaǵy ýaqytta taǵy qansha qarajat bólinetinin naqtylamady.
