Sheshenstan basshysynyń uly Adam Qadyrovty Máskeýge sanıtarlyq avıasıamen tasymaldady. FlightRadar derekterine sáıkes, Reseı TJM-ne tıesili An-148-100-EM sanıtarlyq ushaǵy Groznyıdan ushyp shyǵyp, Máskeý ýaqytymen 01:10-da Vnýkovo áýejaıyna qonǵan.
Ushaq Sheshenstan aýmaǵynan 19:37-de kóterilip, Máskeýge ádettegi reısterge qaraǵanda shamamen jarty saǵatqa erte jetken. Bul reıs Adam Qadyrovtyń jol-kólik oqıǵasyna qatysy bar degen aqparattan keıin tirkeldi.
Sanıtarlyq borttan keıin kóp uzamaı Máskeýge Ramzan Qadyrov ádette sheteldik saparlaryna paıdalanatyn Airbus RA-73417 ushaǵy da ushyp shyqty. Atalǵan áýe kemesi apat bolǵan kúni Dýbaıda bolǵan jáne Máskeýge 17:47-de attanǵan. Ol da Vnýkovo áýejaıyna sanıtarlyq ushaqtan keıin qonǵan.
Buǵan deıin Adam Qadyrov Groznyıdaǵy respýblıkalyq aýrýhanaǵa jetkizilgen. Keıin ony Máskeýge tasymaldaý jóninde sheshim qabyldanǵan.
Sheshenstan bıligi ázirge jol apatyna qatysty resmı túsinikteme bergen joq.
Adam Qadyrov 18 jasta. Ol Sheshenstan Qaýipsizdik keńesiniń hatshysy qyzmetin atqarady. 2025 jylǵy sáýirde Sheshenstan Respýblıkasyndaǵy İshki ister mınıstrliginiń kýratory bolyp taǵaıyndalǵan. Sonymen qatar ol V.V. Pýtın atyndaǵy Reseı arnaıy maqsattaǵy ýnıversıtetin, sondaı-aq Reseı Qorǵanys mınıstrligine qarasty Sheıh-Mansýr jáne Baısangýr Benoevskıı atyndaǵy batalóndardy qadaǵalaıdy.
