Qyzylorda shaharynyń tarıhı mán-mańyzy aıryqsha. Bul týraly Memleket basshysy Qasym-Jomart Toqaev Qyzylorda qalasynda ótip jatqan Ulttyq quryltaıdyń V otyrysynda aıtty.
Jańa ǵana sóz sóılegen Quryltaı músheleri mańyzdy oı-pikirler aıtty. Quryltaıdyń aıasynda paıdaly pikir almasý ótti. Barlyǵy elimizdiń damýyna qajetti bolaryna senemin. Búgin Ulttyq quryltaı jıyny osymen besinshi ret shaqyrylyp otyr. Bul forýmnyń alǵashqy otyrysy ult uıasy Ulytaýda ótti. Ekinshi jıyn túbi bir túrki jurtynyń qara shańyraǵy Túrkistanda boldy. Úshinshi otyrys biregeı Atyraý aýmaǵynda uıymdastyryldy. Al byltyr tarıhı baı Kókshetaý tórinde jınaldyq. Endi mine qasterli Qyzylorda jerinde bas qosyp otyrmyz. Bul halqymyz úshin orny erekshe aımaq. «Syr alashtyń anasy» degen ataly sóz bar, - dedi Memleket basshysy.
Prezıdent osy atyraptaǵy Shirik-Rabat, Jankent, Altynasar, Barshynkent qalalarynyń orny kóne zamannyń ózinde qazaq jerinde damyǵan qala órkenıeti bolǵanyn ańǵartatynyn aıtty.
Qyzylordany sol áıgili qalalardyń zańdy jalǵasy deı alamyz. Bul shahardyń tarıhı mán-mańyzy aıryqsha. Onyń osydan 1 ǵasyr buryn Qazaqstan astanasy bolǵany barshaǵa málim. Bul jerde elimizdiń bolashaǵyna qatysty asa mańyzdy sheshimder qabyldandy, - dedi Qasym-Jomart Toqaev.
