Búgin teńgeniń kúrt qunsyzdanǵanyna narazy bir top belsendi Almatyda Ulttyq banktiń tóraǵasy Qaırat Kelimbetovpen kezdesip, devalvasıa zardaptaryn jeńildetý úshin arnaıy respýblıkalyq qoǵamdyq komısıa qurýdy talap etti, dep  habarlaıdy  "Azattyq  radıosy".

Azattyq tilshisiniń habarlaýynsha, Kelimbetov ortaq respýblıkalyq komısıa qurýǵa qarsy ekenin aıtyp, onyń ornyna nesıe, ıpoteka sharttarymen jeke aınalysatyn, azyq-túlik baǵasymen bólek aınalysatyn salalyq komısıalar qurýdy usynǵan. Onyń sózinshe, ıpotekalyq problemalarmen aınalysatyn komısıa endigi qurylyp qoıǵan jáne búgin tústen keıin onyń otyrysy ótpekshi. Jınalǵan toptan kásipker Qanaǵat Tákeeva ıpotekalyq máselelerdi qaraıtyn komısıanyń búgingi otyrysyna qatysatyn boldy. Kelimbetovpen "Qazaqstan musylmandar odaǵy" uıymynyń jetekshisi Murat Telibekov, saıasatker Jasaral Qýanyshálın, belsendi Tazabek Sámbetbaı, barlyǵy alty adam kezdesken. Devalvasıaǵa narazylar keshe de Ulttyq bankke kelip, Kelimbetovtiń otstavkaǵa ketýin talap etken edi.