Qaraǵandy oblysynda áleýmettik mańyzy bar 33 ónimniń 14-iniń baǵasy qymbattady, dep habarlaıdy oblystyq Statısıka departamentiniń basshysy Janat Sadyqova.

«Áleýmettik mańyzy bar negizgi azyq-túlik ónimderiniń baǵasyna kúndelikti baqylaý qorytyndysy boıynsha, bir aptanyń ishinde 33 ónimniń 14-iniń qymbattaǵany tirkeldi», - dedi búgin oblys ákimdiginde ótken jıyn barysynda J.Sadyqova.

Onyń atap ótýinshe, negizinen oblys aýmaǵyna engizilgen taýarlardyń baǵasy artýda. «Kúnbaǵys maıy orta eseppen 10 teńgege, qara shaı - 15-ten 31-teńgege deıin, maıonez orta eseppen 23 teńgege, máıekti irimshikter - 100 teńgege, qıar - 45-50 teńgege, qyzanaqtar orta eseppen 27 teńgege kóterilgen»,- dep naqtylady statısıka departamentiniń basshysy.

J.Sadyqovanyń sózine qaraǵanda, azyq-túliktiń 15 túriniń: nan, sút, et, sary maı, tuz ben basqa ónimderdiń baǵalary ózgermegen. Statısıka vedomstvosynyń málimetteri boıynsha, túrli saýda oryndarynda 1 surypty un, makaron ónimderi men jarma baǵasy tómendegen.

«Sońǵy eki táýlikte túrli saýda oryndarynda kókónis ónimderiniń baǵasy tómendegeni baıqalady: kartop 13-ten 18 teńgege deıin, sábiz 5-6 teńgege, qyzylsha 12-25 teńgege, pıazdyń bir kelisi úshin 7-den 237 teńgege deıin baǵanyń tómendeýi baıqalady», - dep atap ótti J.Sadyqova.

Oblystyq Aýyl sharýashylyǵy basqarmasynyń basshysy Baýyrjan Asanovtyń habarlaýynsha, búgingi tańda aımaqtyq turaqtandyrý qorynan 150,6 tonna kókónis ónimderi: 132,3 tonna kartop, 8,6 tonna sábiz, 9,7 tonna qyryqqabat ótkizilgen. Ol sondaı-aq baǵany ustap turý maqsatynda jergiliktióndirýshilerdiń qatysýmen aýyl sharýashylyǵy jármeńkeleri uıymdastyrylyp jatqanyn jetkizdi.

«15 aqpan kúni ótkizilgen jármeńkede 21 tonnadan astam et ónimi, 1,3 tonna sút ónimi, 100 myń danadan astam jumyrtqa, jalpy alǵanda 24 mln teńgeniń ónimi satyldy. Bul saýda-sattyqtaǵy baǵa naryqtaǵy baǵadan 15-20 paıyzǵa tómen boldy», - dedi B.Asanov.

Otandyq taýarlar boıynsha baǵanyń ósýine negiz joq, dep atap ótti oblys ákimi Baýyrjan Ábdishev. «Baqylaýdy jalǵastyryńyzdar. Eger ony oryndamaıtyndar bolsa, shara qoldanyp, qatań túrde jazalap, jolyn kesetin bolamyz», - dep málimdedi óńir basshysy.