Teńgeni "qunsyzdady, qunsyzdandy!" dep oıbaılaısyzdar. Qunsyzdansa - qoqysta jatpas pa edi? Qaıdaǵy? Sharýasy jalpaq degen dostarymnyń qaltasynda jel azynap tur. Ózim sıaqty. Soǵan qaraǵanda AQSH dollary asqaqtaǵan saıyn, teńgemiz tesikke tyǵylyp qalǵan ba deımin.
Áńgime bul týraly da emes. Teńgeniń shyǵý tarıhy jaıly. Ony bylaı biletin de sıaqty edim. Sóıtsem, ol bilgenim tym jalań, atústi eken. Óıtkeni...
Konstıtýsıamyzdyń 98-babynyń birin qaldyrmaı, muqıat oqyp shyqtym. Ata zańda ulttyq valútamyz - teńge týraly bir aýyz sóz joq. Tipti, "Ulttyq valúta týraly" zań da, qaýly da qabyldanbapty. Resmı qujattardan prezıdenttiń "Ulttyq valútany aınalymǵa engizý týraly" Jarlyǵynan basqa túk tappadym.
Menińshe, bul - nonsens nárse! Sonda, osy ýaqytqa deıin teńgemiz zańsyz aınalymda júrgeni me? Mysaly, AQSH-tyń óz aqshasy paıda bolǵanǵa deıin ıspan, aǵylshyn, fransýzdyń valútasyn qoldandy. 1785 jyly AQSH Kongresi dollardy aqsha birligi retinde aınalymǵa shyǵarý týraly Qaýly qabyldaǵan. Sodan keıin ǵana, ıaǵnı, 1792 jyly Fıladelfıada aqsha shyǵaratyn Monetalyq Saraıdy turǵyzady.
Alysqa siltemeı, myna Ýkraınany alaıyq. 1918 jyly Ortalyq Rada grıvnany ulttyq valúta etip engizý týraly zań qabyldady. Keıin, sol zańnyń negizinde grıvnany qaıta qalpyna keltirdi. Al biz she? Bizdiń uıqyly-oıaý depýtattarymyz ne bitirgen? Áı, zańgerlerdiń kózinen tasa qalǵan teńgem-aı, teńgem-aı! Tentiremeı, tentiretpeı, turaqtanshy.
Toqtar Jaqashtyń «Feısbýk» paraqshasynan alyndy
