Ulttyq ulan «Ońtústik» óńirlik qolbasshylyǵynda óńirlik qolbasshylyqqa baǵynysty áskerı bólimderdiń 2015 jylǵy oqý kezeńin qorytyndylaýǵa arnalǵan Áskerı keńes ótti, - dep habarlaıdy «Qamshy» portaly.
Keńeste áskerı bólimderge 2015 jylǵy oqý kezeńinde mindettelgen tapsyrmalardy tolyqtaı oryndaýy, áskerdegi hal-ahýal, jaýyngerlik-qyzmettik is-áreket pen atqarylǵan jumystardyń nátıjesi, sonymen qatar 2016 jylǵa júkteletin mindetter týraly taǵy da basqa máseleler qarastyryldy. Bul jóninde qolbasshynyń orynbasarlary óz baǵyttary boıynsha atqarylǵan jumystarǵa esep berip, aldaǵy 2016 jylǵa kózdelgen maqsattarǵa jetý jolyndaǵy josparlaryn baıandady.
- 2015 jylǵy ekinshi jartyjyldyqta óńirlik qolbasshylyq áskerı bólimderi turaqty jaýyngerlik daıarlyq, nysandardyń berik kúzeti, sottalǵandardy qadaǵalaý men olardy aıdaýyldaý, sonymen qatar qoǵamdyq tártip pen qaýipsizdikti qamtamasyz etý sekildi qyzmetterdi josparǵa sáıkes oryndady – dep baıandady qolbasshynyń birinshi orynbasary – shtab bastyǵy Andreı Qaskelenov. Bunymen qosa birqatar áskerı bólimder komandırleriniń baıandamalary tyńdalyp, birshama máselelerdiń sheshimin sheshý jolyndaǵy usynystary ortaǵa salyndy.
Áskerı keńestiń aıaǵynda 2015 jylǵy jaýyngerlik-qyzmettik mindetterdi úzdik oryndaǵan áskerı bólimderdiń komandırleri gramotalarmen, medaldarmen jáne aýsyp otyratyn kýbokpen marapattaldy.
Jalpy Ulttyq ulan «Ońtústik» óńirlik qolbasshylyǵyna qarasty áskerı bólimderdiń áskerı qyzmetshileri 2015 jyly jaýyngerlik-qyzmettik mindetterin adal atqaryp, talaı mádenı-qoǵamdyq, saıası is-sharalardy ótkizý barysynda qaýipsizdikti qamtamasyz ete bildi. Atap aıtar bolsaq, kúni keshe ǵana ótkizilgen ánshi Qaırat Nurtastyń án keshinde eshqandaı quqyq buzýshylyqqa jol bergen joq. Bul turǵyda ulandyqtardyń Qazaqstan Respýblıkasy İİM İshki ister bólimderiniń qyzmetshilerimen birlese atqaryp jatqan jumystaryn eskergenimiz jón. Osyndaı ózara birlesken jumystardyń arqasynda jýyrda İle aýdany Jetigen kentinen joǵalyp ketken 20 jasar jas qyz Aızada Avlatarovany Qapshaǵaı mańynan ulandyq áskerı qyzmetshiler taýyp, ony otbasyna aman-esen tapsyrdy. Bunymen qosa 2015 jylǵy shilde-tamyz aılarynda Almaty qalasy Naýryzbaı aýdanyndaǵy júrip ótken seldiń saldaryn joıý úshin ulandyq áskerı qyzmetshiler keńinen tartyldy. Ulandyqtardyń arqasynda tótenshe jaǵdaı aýmaǵynan 160 adam qaýipsiz jerge kóshirilip, eldi-mekendegi 800 metrge jýyq aýmaq, Aqsaı shatqalyndaǵy 2 taýly ózenniń 2 arnasy, 90-ǵa jýyq jekemenshik úı-jaılar jáne 3 mektep pen 1 balabaqsha qoqystar men balshyqtardan tazartyldy. Sondaı-aq, qaýipti qylmyskerlerdi aıdaýyldaý, sottalǵandardy qadaǵalaý, onymen qosa strategıalyq mańyzdy memlekettik nysandardy kúzetý men qupıa júkterdi baǵyttap alyp júrý boıynsha da birshama mindetter ýaqtyly jáne sapaly oryndaldy.
Osyndaı jaýapkershiligi mol mindetterdi atqarý barysynda Ulttyq ulan «Ońtústik» óńirlik qolbasshylyq áskerı bólimderiniń ofıserleri, kelisimshart boıynsha áskerı qyzmetshileri jáne sarbazdary senimdi is-áreketteriniń arqasynda joǵary nátıjeli jaýyngerlik daıarlyqtaryn kórsetti.
