Almaty metrosynyń burynǵy basshysy Murat Ókshebaev 9 jylǵa sottaldy, ol jazasyn jalpy tártiptegi kolonıada óteıdi, - dep habarlaıdy «Qamshy» portaly Tengrinews.kz – ke silteme jasap. Sonymen qatar, oǵan 5 jylǵa deıin memlekettik qyzmette jumys isteýge tyıym salynyp, "Qurmet" ordeninen aıyryldy.

Al, onyń burynǵy orynbasary Erbol Qaldybaev 8 jylǵa bas bostandyǵynan aıyryldy jáne onyń múlki tárkilenip, 3 jylǵa deıin memlekettik qyzmette jumys isteýine tyıym salyndy. Taǵy bir aıyptalýshy, "SredAzEnergoServıs" JSHS basshysy Konstantın Antıpov ta 8 jylǵa sottalyp, múlki tárkilenetin boldy, sonymen qatar, 3 jylǵa deıin komersıalyq uıymdarda jumys isteý quqyǵynan aıyryldy. Úkimdi Medeý aýdandyq soty shyǵardy.

Sot úkimimen shyǵyndy úsh aıyptalýshy birigip óteıdi, jalpy kólemi - 2 mıllıard 503 mıllıon teńge. Árqaısysyna 8 mıllıon 343 myń teńgeden keledi. Sonymen qatar, saraptamalar júrgizilgeni úshin Ókshebaev pen Antıpov 59 684 teńgeden tóleıdi, al Qaldybaev - 24 230 teńge. Úkim zańdy kúshine engen joq. Sýdıa sot sheshimine shaǵym keltirýge bolatynyn túsindirdi.

Buǵan deıin Ókshebaevqa "Senip tasyrylǵan bóten múlikti ıelenip aldy nemese ysyrap etti" degen aıyptyń taǵylǵany habarlanǵan bolatyn. Osyǵan deıin bolǵan sot otyrysynda Qaldybaev óz kinásin moıyndamaıtynyn málimdedi. Sonymen qatar, aıyptalýshylarǵa prosesýaldyq kelisim jasaý usynyldy, biraq olar bas tartty. Aıyptaýǵa sáıkes, is fıgýranttary qylmystyq sqema jasap, jalǵan kásiporyn ashqan. Ol tenderlerge qatysýǵa tıis bolǵan. Osylaısha, olardyń kompanıasy konkýrstarda jeńiske jetken. Shyǵynnyń kólemi mıllıardtap sanaldy.

Aıta keteıik, 2009 jyly Ókshebaev 120 mıllıon teńgeni maqsatsyz jumsaǵany úshin áriptesterimen birge úı qamaýyna alynǵan bolatyn. Alaıda keıin Ókshebaev bosatylyp, jumysyna oraldy. Sońǵy kezderi ol qala máslıhatynyń depýtaty bolyp qyzmet etti.