Bıyl Qaraǵandy oblysynda búdjet qarajatyn qatań únemdeý jáne tıimdi paıdalaný maqsatynda jańa jyl merekesin atap ótýge qarjy bólingen joq, - dep habarlaıdy «Qamshy» portaly oblys ákimdigine silteme jasap. 

Bıylǵy jyly Qaraǵandy qalasyn bezendirýge bir tıyn da qarjy jumsalmaǵan. Atap aıtqanda, ótken jylǵy jańajyldyq áshekeıler men atrıbýttar paıdalanyldy.

Buǵan qosa, oblys ákimi Nurmuhambet Ábdibekovtiń tapsyrmasyna sáıkes qarjyny únemdeý maqsatynda korparatıv múldem toılanbaıdy.

Aıta keterligi, bıylǵy jyly Qaraǵandy oblysynyń bas shyrshasynyń shamdary Ulttyq mereke – Táýelsizdik kúninen keıin jaǵyldy.

Búgin balaqaılarǵa syılyq retinde jańa jyl qarsańynda Qaraǵandy oblysy Abaı aýdanynda 2 qabatty balabaqsha ashyldy. Balabaqsha aýmaǵy 1930,8 sharshy metrdi qurasa, záýlim ǵımaratta 200 búldirshin tárbıelenedi.

Sonymen qatar, merekege tartý retinde Buqar jyraý aýdanynda 140 oryndyq arnalǵan balabaqsha ashyldy. Onda 2-6 jas aralyǵyndaǵy balaqaılar bilim alady.

Buǵan qosa, Qaraǵandy qalasynda 56 otbasy baspanaly boldy. Jalpy aıtqanda, bıyl Qaraǵandy oblysynda 11 aıdyń qorytyndysy boıynsha 272 myń sharshy metr paıdalanýǵa berilip, myńdaǵan otbasy baspanaly boldy. Sonymen qatar, aǵymdaǵy jyly respýblıkalyq jáne oblystyq búdjetten taǵy 11 nysannyń qurylysy jalǵasýda.

Bunyń barlyǵy – toı toılaý úshin emes, oblys turǵyndarynyń áleýetin jaqsartý úshin jasalyp otyrǵan jumystar.