Aýyr atletıkadan 2014 jylǵy álem chempıony ári 2015 jylǵy qola júldeger Jasulan Qydyrbaev dopıng úshin ómir boıyna dıskvalıfıkasıaǵa ushyraýy múmkin, - dep habarlaıdy «Qamshy» portaly Vesti.kz – ke silteme jasap. 

Sonymen qatar, búgin, 24 jeltoqsanda Halyqaralyq aýyr atletıka federasıasynyń (IWF) qazaqstandyq taǵy eki aýyratlet Almas Óteshov pen Ermek Ómirtaıdy dopıng qoldandy degen kúdik týǵany úshin ýaqytsha shettetkeni belgili boldy. Málimdemede qazaqstandyqtardyń dopıng-synaǵynda tyıym salynǵan zattardyń anyqtalǵany jazylǵan. Federasıa jalpy 17 sportshyny ýaqytsha shettetip otyr. "Qara tizimge" ilingenderdiń qatarynda Qazaqstannyń, Reseıdiń, Ázirbaıjannyń, Belarýstiń, Grekıanyń, Moldovanyń jáne Soltústik Koreıanyń ókilderi bar. 

Eger Qydyrbaev tyıym salynǵan zatty qasaqana qoldandy degen nusqa dáleldense ekinshi márte eskertý alǵandyqtan ol uzaq merzimge, tipti ómir boıyna dıskvalıfıkasıaǵa ushyraýy múmkin. Al eger shtangashy aǵzasyna zattyń kezdeısoq túsip ketkenin dáleldeı alsa dıskvalıfıkasıa alyp tastalady.  

Basylymnyń málimetinshe, 2013 jyldyń qańtar aıynda Halyqaralyq aýyr atletıka federasıasynyń músheleri Mánmada ótken Azıa jastar birinshiliginde bas júldeni jeńip alǵan Qydyrbaevtyń qanynda dopıng taýyp, eki jylǵa dıskvalıfıkasıaǵa ushyraǵanyn habarlaǵan bolatyn. Dıskvalıfıkasıanyń merzimi 2014 jyldyń 11 qarashasynda aıaqtaldy. Al tórt kún ótkennen keıin ol Almatyda álem chempıonatyn jeńip aldy.

Eske salaıyq qazaqstandyq shtangashylar Almas Óteshov, Jasulan Qydyrbaev jáne Ermek Ómirtaı 20-29 qarashada Hústonda ótken álem chempıonatyna qatysqan edi. 94 kelige deıingi salmaq dárejesinde Óteshov kúmis medal, osy salmaqta Qydyrbaev qola júlde alǵan bolatyn. Al Ermek Ómirtaı medalǵa ilige almaǵan edi.