Qyzylorda oblysynyń ákimi Qyrymbek Kósherbaev nesıeni durys paıdalanbaýshylarǵa kóńili tolmaıtynyn bildirip, ondaı nesıe alýshylardy jazalaý kerektigin aıtty, - dep habarlaıdy «Qamshy» portaly.

Syr óńiriniń basshysy Astanada ótken baspasóz máslıhatynda oblystaǵy ekonomıkalyq-áleýmettik damý baǵytynda atqarylǵan jumystardyń qorytyndysyn jarıalady. Oblys ákimi keler jyly kásipkerlerge shaǵyn jáne orta bıznesti damytý úshin beriletin nesıe talaptaryn kúsheıtýdi usyndy. Onyń aıtýynsha, kásipkerler bul qarajatty maqsatsyz jumsaıtyn jaǵdaılar da kezdesetin kórinedi.

«2016 jyly biz Qyzylorda oblysynda shaǵyn kásipkerlikti qarjylandyrýdy úsh ese arttyrǵaly otyrmyz. Sonymen qatar, nesıe alýshylardyń jaýapkershiligin de kúsheıtý qajet. Ol úshin jaýapsyz nesıe alýshylardyń naqty tizimi jasalyp, nesıe búrolaryna ótkizilýi kerek. Bul arqyly biz, qoı satyp alý úshin 3 mıllıon teńgege deıingi shaǵyn nesıe alyp, ony týysynyń toıyna jumsaǵan adam endi qaıtip eshqashan nesıe ala almaıtyn júıege qol jetkizemiz», - dep málimdedi oblys basshysy.

«Jaýapsyz nesıe alýshylardy kótermeleýge bolmaıdy. Al, Ulttyq qordan bólingen qarajatty uqypty jumsap, nesıesin ýaqytynda japqan kásipkerler kelesi joly úsh mıllıon emes, bes mıllıon teńge nesıe alatyndaı múmkindik jasasaq ádil bolady», - degendi qosa aıtty.

Sondaı-aq, ol memlekettik baǵdarlamalarmen bólinip jatqan nesıeler iri jaýapkershiligi shekteýli seriktestikterge ǵana emes, aıaǵynan endi turyp jatqan shaǵyn kásipkerler men sharýa qojalyqtaryna da jetetindeı múmkindikter qarastyrý kerektigine nazar aýdartty.