Jalań qolmen qasqyr alatyn ańshy Erjan Qasymbekov Shyǵys Qazaqstan oblystyq "Dıdar" gazetine bergen suhbatynda ózi jaıynda aıtyp berdi.

Basylymnyń málimetinshe, aýyldastary ony Qasqyr Erjan dep atap ketken. Tórt túligin órgizip, atakásipti jalǵastyryp kele jatqan Erjan túz taǵysynyń tisi malǵa batsa boldy, ony almaı qoımaıdy. Ol qasqyrdy tehnıkamen qýyp júrip, snaıpermen atyp almaıdy, kádimgi dástúrli ádispen soǵyp alady nemese ıt salyp aýlaıdy.

"Tarbaǵataı aýdany, Úshtóbe aýylynyń turǵyny Erjan Qasymbekov bala kezden ákesine erip Ókpeti, Dolanqara, Jeldiqara, Qyzyltas taýlaryn kezip ósken. Ákesi Jumaǵazy ańǵa shyǵyp, ıt júgirtkenin kórip erjetken Erjan segizinshi synypta oqyp júrgende birinshi ret qasqyr alǵan. Sodan beri búginge deıin aýlaǵan taǵylarynda esep joq", - delingen jarıalanymda.

Ol ata-babasynyń izi qalǵan Qarajal qystaǵynda baǵyp otyrǵan malyn qasqyrǵa tartqyzbaýdyń amalyn oılap qysty ótkizedi. Jylda - osy. Jaz jaılaýǵa túskenshe, eki kózi tórt bolyp ormannyń sur jendetterin ańdıdy. Tipti, aýyldan uzap ketken qasqyrdyń sońyna túsip, kún júrip, tún júrip, almaı tynbaıdy. Kózine túsken qasqyrdy jibermeı, naǵyz dástúrli ańshylarǵa saı tásildi qoldanatyndyqtan bolsa kerek, aýyldastary Qasqyr Erjan dep tanıdy. Al uldary ózderin "qasqyrdyń bóltirikterimiz" deıtin kórinedi. Basylymnyń málimetinshe, Erjannyń úlken uly Ersaıyn da ańshylyq dese delebesi qozyp turady. Sonymen qatar, otbasynda egiz uldary Rústem men Dastan bar.

Erjannyń inisi Mereı Qartovtyń aıtýynsha, birde Erjan apanynyń aýzynda aqyryp turǵan aıýmen betpe-bet kelip qalady. Abyroı bolǵanda, jalma-jan ıyǵyndaǵy myltyqty oqtap jiberip, shúrippeni basyp úlgiredi. Qorǵasyn oq tarpa bas salǵaly turǵan aıýdyń keýde tusyna tıip, ol Erjannyń ústine qulaǵan eken.

Esterińizge salsaq, buǵan deıin ańshy Erjan jaıly saıtymyzda vıdeo jarıalanǵan edi. Ol vıdeo áleýmettik jelide qyzý talqylanyp, qoldanýshylar ańshynyń batyrlyǵy men qaısarlyǵyna tánti boldy, kóptegen pikirler jazyp, qyzý bólisti.