Qazaqstandyq iri kásipkerlerdiń biri Barlyq Meńdiǵazıev óz bıznesin eńbek ujymynyń ıeligine berýdi josparlaýda. Bul týraly óziniń Feısbýktegi paraqshasynda tanymal zańger Jangeldi Súleımenov málim etti. 

 Bul Qazaqstan tarıxynda alǵash oryn alaıyn dep otyr. B. Meńdiǵazıev bıznesti qarapaıym jumysshylarǵa berýge qatysty barlyq zańdyq úderisterdi sońyna jetkizýdi tolyǵymen zańger J. Súleımenovke tapsyrǵan. "Bul Qazaqstan tarıxynda buryn-sońdy bolmaǵan oqıǵa. Barlyq Meńdiǵazıev óziniń bıznesin eńbek ujymyna berýdi josparlaýda. Barlyq pen onyń zaıyby Nurıa óz kásipterin 20 jyl boıy damytyp keldi, qazirgi ýaqytta ol birneshe baǵyttar boıynsha kásipkerlikti dóńgeletýde. Táýelsiz taldaýdyń nátıjesi boıynsha, onyń bıznesi ondaǵan mıllıon dollar turady. Ol ónerkásiptik jáne keńse ǵımarattary, kólik, jabdyqtar, materıaldar men texnologıalar. Ol jıyrma jyldyq jumys pen bilikti mamandar. Bul - ádil iskerlik bedel. Osynyń barshasyn Barlyq pen Nurıa osy jyldary ózderimen birge bolǵan adamdarǵa teginnen tegin bermek", - dep jazady zańger. 

Onyń aıtýynsha, mundaı tájirıbe áli elimizde oryn alǵan emes. "Jeke basym, Qazaqstanda osyǵan uqsas nárseniń oryn alǵanyn bilmeımin. Shet memleketterde mundaı kezdesip jatady, biraq bizdiń elde bul tuńǵysh ret bolyp jatyr", - dep atap ótti J. Súleımenov. 

Zańgerdiń sózine qaraǵanda, Barlyq kóp jyldar boıy muqtaj adamdarǵa kómektesýmen keledi. Ol jetimder úıiniń búldirshinderine úlken kómek kórsetýge yntyq. "Endi Barlyq pen Nurıa óz qyzmetkerlerine osylaı kómektesýdi jón sanap otyr. BQO Aqsaı qalasynda 29 jeltoqsanda 9-30 saǵatta eńbek ujymynyń jınalysy ótedi. Sol jerde Barlyq óz sheshimin jarıa etpek. (...) Barlyq pen Nurıa maǵan osy kelisimniń zańdyq qyryn júrgizýdi surady", - deıdi J. Súleımenov. 

Naqtylaı ketsek, qazirgi ýaqytta Barlyq Meńdiǵazıevtiń «KSS» JSHS kásiporny 50 mln. dollarǵa baǵalanyp otyr.