Jaqynda Qazaqstan estradasynyń juldyzdary kórermen nazaryna Azary&Kleo dýetimen birge «Jańa jylyńmen, Qazaqstan» atty beınebaıan usyndy. Jańa án qazaq jáne orys tilderinde jazylǵan.
Beınebaıanda Serik Ibragımov, All Davai toby, Dıana Sharapova, Zarına Omarova, Kental jáne Azary&Kleo dýeti birge óner kórsetken. Ánshiler osy ánimen halyqqa kóterińki kóńil-kúı syılaýǵa tyrysqan.
«Biz Qazaqstan halqyn jańa jyl merekesimen ózge ártistermen qosylyp, quttyqtaýdy maqsat ettik. Ári ol qolymyzdan kelgenine senimdimiz», – dedi ánshi Kleo.
Azary&Kleo tobynyń solısine sensek, keı ánshiler formatynyń bólek ekenin syltaýratyp, birge án salýdan bas tartqan. Biraq, bul jerde eshqandaı da qatyp qalǵan format joq ekenin meńzegen ánshi negizgi maqsat halyqty meıramymen quttyqtaý ǵana bolatynyn jetkizdi.
Ánniń avtory Azary&Kleo tobynyń ánshisi Bajan esimdi ónerpaz. Birge án shyrqaǵan ártister halyqtyń oń baǵasyn beretinine úmittenedi.
