Elimizde qazaqstandyq aýyr atletshilerdiń qatysýymen oryn alǵan dopıng-daýdy tekserý úshin komısıa quryldy, - dep málimdedi QR Mádenıet jáne sport mınıstri Arystanbek Muhamedıuly.

«Biz qazir mınıstrliktiń janynan Qazaqstan aýyr atletka federasıasymen birlesip komısıa qurdyq. Sebebi bul oqıǵa bárimizdi alańdatyp otyr. Biraq men bul aldyn ala qoıylǵan dıagnoz ekenin, aqtyq dıagnoz emestigin aıtqym keledi. Árıne, biz qazir apelásıaǵa berip jatyrmyz. Ár sportshy dárilerge testileýden ótedi. Olardyń qorytyndysyn biz kútemiz», – dedi Muhamedıuly juma kúni jýrnalıserge.

Bul rette mınıstr aýyr atletshilerdiń bapkerlerimen sóılesetinin jetkizdi.

 «Bizdiń sportshylarymyzdy dári ishýge ıtergen bapkerlerdi biz jazalaımyz, sebebi oǵan jol berýge bolmaıdy. Biz taza sport úshin kúresemiz. Onyń ústine biz sportshylarymyz úshin alańdaýly emespiz. Bizde zapastaǵy sportshylarymyz da jetkilikti. Bizdiń jastar arasynda ár salmaq kategorıasynda úmit artarlyq jastar jetkilikti. Biz úshin Qazaqstannyń sport derjavasy retindegi bedelin saqtap qalý mańyzdy. (…) Qalaı bolǵanda da biz barlyq oqıǵany muqıat taldaýymyz kerek. Alda Rıo-de-Janeırodaǵy Olımpıada oıyndary bar, oǵan biz jaqsy nátıjelermen shyǵyp otyrmyz», – dep qorytyndylady Muhamedıuly.

Qazaqstandyq BAQ-tar habarlaǵandaı, 24 jeltoqsan kúni aýyr atletıka halyqaralyq federasıasy (IWF) dopıng-baqylaýdyń zerthanalyq taldamalarynyń nátıjesinde qazaqstandyq úsh aýyr atletshini – Almas Óteshev, Jasulan Qydyrbaevty jáne Ermek Ómirtaıdy antıdopıngtik erejeni buzýy múmkindiginen halyqaralyq jarystarǵa qatysýdan ýaqytsha alastatty.

Habarlanǵandaı, sportshylardan Hústondaǵy 2015 jylǵy álem chempıonatyndaǵy alynǵan dopıng-baqylaýdyń «A» synamasynda tyıym salynǵan dáriler anyqtalǵan. Hústonda Óteshov kúmis medal, Qydyrbaev – qola medal alǵan. Sportshylar Rıo-de-Janeırodaǵy Olımpıadaǵa qatysýǵa daıyndalyp júrgen.