Almaty oblysyndaǵy Uzynaǵash jáne Zarechnyı kentterindegi 28237 jáne 7552 áskerı bólimderinde Ulttyq ulan jas sarbazdarynyń áskerı ant qabyldaý rásimi bolyp ótti, - dep habarlaıdy «Qamshy» portaly Ulttyq ulan «Ońtústik» óńirlik qolbasshylyǵy baspasóz qyzmetine silteme jasap.
Áskerı qyzmetshiniń ómirinde bir-aq ret bolatyn osy rásimdi tamashalaýǵa jas jaýyngerlerdiń ata-analary, týǵan-týystarymen qatar Ulttyq ulan «Ońtústik» óńirlik qolbasshylyǵynyń ofıserleri, Ulttyq ulan ardagerleri jáne ózara árekettegi baılanys organdarynyń ókilderi de arnaıy qatysty.
Ant qabyldaý merekesin áskerı bólim komandırleri saltanatty túrde ashyq dep jarıalaǵan soń 300-ge jýyq Ulttyq ulan jas sarbazdary ata-analary, týǵan týystary men komandırleriniń aldynda «Otanǵa adal qyzmet etemiz!» dep áskerı saltanatty túrde ant qabyldady.
Ant qabyldaý rásimine arnaıy kelgen Ulttyq ulan «Ońtústik» óńirlik qolbasshylyǵy qolbasshysynyń orynbasary Marlen Appazov pen «Ońtústik» óńirlik qolbasshylyǵynyń tárbıe jáne áleýmettik-quqyqtyq jumystar basqarmasynyń bastyǵy Nıaztaı Álkeshev jas sarbazdarǵa ózderiniń jalyndy quttyqtaý tilekterin arnap, olardy Otan aldynda qabyldaǵan áskerı anttaryna adal bolýǵa, memleketimizdiń tynyshtyǵyn qorǵaý jolyna óz úlesterin qosýǵa shaqyrdy. Bunymen qosa Ulttyq ulan Ardegerler keńesiniń atynan otstavkadaǵy polkovnık Soıýzjol Jumanov jáne LA-152/14 túzeý mekemesi bastyǵynyń orynbasary Baqyt Jumabekov da sarbazdarǵa jalyndy tilekterin arnady.
Ata-analardyń atynan sóz sóılegen jas sarbaz Eltaı Beriktiń ákesi aqsaqal Buzaýbaev Oral sarbazdarǵa osy qabyldaǵan anttaryna adal bolýlaryn, áskerı qyzmettiń qıyndyqtaryna moıymaı, tabandylyqpen tótep berýge shaqyryp, úıge, ata-analaryna aman-esen oralýlaryn tilese, sarbaz Ganeev Vıktordyń anasy ulandyqtarǵa arnap óleń oqyp berdi. Bunymen qosa sarbaz erejep Qurbanovtyń ájesi Ibragımova Anar óz nemeresiniń Ulttyq ulan qatarynda áskerı boryshyn óteıtinin maqtan tutanyn aıtyp, qýanyshymen bólisti.
Áskerı ant qabyldaý rásiminiń resmı bóliginen soń jınalǵan jurtshylyq atqyshtar vzvody sarbazdarynyń qarýmen jáne qoıan-qoltyq urysy tásilderin kórsetý ónerin tamashalady.
