Qoı jyly ońtústik astanamyz Almaty jurty úshin nesimen este qaldy? Alyp shaharda qýanarlyq ta, kóńil jabyrqatatyn da sátter kóp bolypty, - deıdi 24.kz.
Sáýir aıynda qala turǵyndary úshin qýanyshty oqıǵa boldy. Metropolıten jelisi 3 shaqyrymǵa uzaryp, halyq tyǵyz ornalasqan aýdandarǵa jetti. Bul jolaýshylar tasymalynyń yńǵaıly ári jyldam túri. Jerasty jolymen osy kúnge deıin 20 mıllıon jolaýshy tasymaldanǵan.
Al, maýsymnyń aptap ystyq kúnderi almatylyqtardyń záre qutyn qashyryp, biraz ábigerge saldy. Sel júrip, taýdan kelgen laı sý Qaraǵaıly yqshamaýdanyndaǵy júzdegen úıge nuqsan keltirdi. Alaıda jumyla kótergen júk jeńil degendeı, bul aýyldy qalpyna keltirý jumystaryna úlken-kishi demeı, barsha jurt atsalysty.
Lılıa Qulynbaeva, Qaraǵaıly yqshamaýdanynyń turǵyny:
- Soldattarǵa kóp-kóp rahmet. Bir mınýt otyrmaı, «sizge kelip kómektesemiz» dep 15 soldat esik aldymdy ashyp berdi 13 jastaǵy Dıas kómekke kelgenderdiń ishinen elgezektigimen tanylǵan batyr bala. Kópke úlgi bolǵan balaǵa qala ákimdigi alǵys aıtyp, syılyq jasady. Qaraǵaılydaǵy qaıǵyly jaǵdaı saldary qalypqa kele bastaǵanda Almatyda erekshe qýanyshty jańalyq boldy. Dúnıege tórtem keldi. Úsh qyz bir uldy dúnıege ákelgen aıaýly ana Baıan Abdýlınanyń júzinen meıirim nury tógiledi.
Baıan Abdýllına, tórtemniń anasy:
- 11-12 aptada men Qalqaman aýrýhanasyna túsken kezde sol jerde dárigerler tórtem ekenin anyqtady. Alǵashynda joldasym ekeýmiz ózimiz túsinbeı qaldyq.
Bıyl qaýipsiz dep sanalatyn tramvaılardy ne túlen túrtkeni belgisiz, qalada qoǵamdyq kólikti durys tizgindemeý saldarynan eki ret iri jol apaty boldy. Birneshe kólikti jaıpap ótip, 20 shaqty júrgizýshige shyǵyn ákelgen oqıǵadan keıin arnaıy komısıa taramvaılardy ýaqytsha toqtatty. Endi qala ákimdigi depony jańartyp, eskirgen temir joldardyń ornyna jańa júrdek elektr vagondaryn iske qosýdy josparlap otyr.
Bıyl tamyz aıynda Almatyda taǵy bir kóńilge qaıaý túsirgen jaǵdaı boldy. Jetisý aýdanyndaǵy Tobaıaqov kóshesinde ornalasqan eski úılerdiń birinen shyqqan órt aınalany jalmap, kórshi úılerdi de túgel kúlge aınaldyrdy. Sol kezde bir mezette 60 adam úısiz-kúısiz qalǵan. Bastaryna kún týǵan jandar jergilikti ákimdikten janashyrlyq pen kómek qoly sozylady dep oılamaǵan bolatyn.
Al, jańa jyl qarsańynda olarǵa úı berildi. Qala búdjetinen qarjy bólinip, Tótenshe jaǵdaı departamentimen birigip, az ýaqytta ár otbasyǵa zaman talabyna saı, yńǵaıly 2 bólmeli baspana salynyp berildi.
Marıa Satybaldıeva, qala turǵyny:
- Basymyzǵa is túskende oılaǵanymyz joq, dalada qaldyq dedik. Al búgingi tańda jańa qonysqa kirip jatyrmyz. Rahmetimizdi aıtamyz. Qýanyshqa kenelgen 15 otbasy jańa jyldy jańa páterde qarsy alatyn boldy.
