Arab elderi men Qytaıdyń myqtylyǵyn byltyrǵy jyl aıqyn dáleldedi. Brent markaly munaıdyń baǵasy túsip edi, álem elderi táltirektep qaldy. Al, qytaıdyń ıýany sál arzandaǵanda, dúnıejúziniń dizesi diril qaqty...
«Daǵdarys Qazaqstanǵa soqpaı, Ózbekstan men Qyrǵyzstan taýlarynyń ortasymen ótip ketti» - dep, ertegi soqqan qazaq úkimetiniń andersondarynyń ótirikter ashylyp, abyroılary aırandaı tógildi.
Byltyrǵy asa aýyr jylda álemdegi eń álsiz valúta - qazaq teńgesi boldy. Belorýs rúbli - 54,3 paıyzǵa, ýkraın grıvnasy - 48,7 paıyzǵa, qazaq teńgesi - 85,2 paıyzǵa qunsyzdandy. Iaǵnı, eger aqshasy qunsyzdanýdan álemdik Olımpıada ótkende, altyn medal bizdiki bolar edi. Ázirbaıjannyń manaty, zambıı men malavıılik kvacha, argentındik peso, mozambıktiń metıkaly, brazılıalyq real da arzandap ketti.
Bir qyzyǵy, qazaq úkimeti: «Reseı valútasy qunsyzdanǵandyqtan, teńgemiz tentirep qaldy» - dep syltaýratqanymen, orys aqshasy álsiz valútalardyń qataryna kirgen joq. Buǵan ne deısiz?..
Taǵy bir «ǵajaıyp»: Somalı degen el – kedeı jurt. Biraq, byltyr somalılik shılıńtiń baǵamy edáýir kúsheıe tústi. Tipti, lıvannyń fýnty da eńsesin tiktep aldy...
Búdjetiniń 75 paıyzy munaı satýdan túsken qarjydan quralatyn qazaqtyń teńgesi eki esedeı qunsyzdanyp, halyqtyń qaýqary qaıtyp qaldy. Menińshe, Kárim MÁSİMOVtyń úkimeti 2006 jyldan beri, baqandaı 10 jyldyń ishinde, daǵdarystyń daýasyn tappasa, budan ári qaraı úmit qylýdyń qajeti de joq, maǵynasy da bolmaıdy...
Óıtkeni, ulttyq aqshasy 85 paıyz qunsyzdanǵan elde - zeınetaqy men shákirtaqyny 25 paıyzǵa ósirip, esep-qısap qylǵan mamandardyń (Kárim Másimovtyń úkimeti - Q.Ǵ.) kásibı dárejesine qoıylatyn baǵa – qanaǵattanarlyqsyz! Jańa kúntizbedegi betashar sózimiz osy!
...Urysy úptep jutqan, qarysy qarpyp jegen qazaq eli de áýpirimdep jańa jyldyń esigin ashty. Byltyrǵy tonalýdan - ońalý ońaı emes. Qaısybir qısyq-qyńyr sáýegeler bıylǵy jyldyń da «ońaı jaǵylatyn jańǵaq» bolmaıtyndyǵyn aıtyp, sandyraqtaıdy...
Óz basym, elimniń búgini – baqýat, erteńi – eńseli bolsa degen dámedemin.
Eń bastysy, árbirimizdiń júregimiz ben sanamyzda daǵdarys bolmasyn! El men jer ázir qutty qonysynda. «Orynda bar – ońalar!..» Keshegi qaısar babam solaı degen...
Qajymuqan ǴABDOLLA
