Qazaqstan musylmandary dinı basqarmasynyń tórt baǵytqa arnalǵan negizgi josparly jumysyn júıeli iske asyrý maqsatynda QDMB Dinı bilim jáne ǵylym bóliminiń meńgerýshisi Baqtybaı Beısenbaev Túrkistan qalasyndaǵy Q.A.Iassaýı atyndaǵy halyqaralyq qazaq-túrik ýnıversıtetine arnaıy is-saparmen bardy. Bul týraly «Qamshy» portaly e-islam.kz/ – ke silteme jasap habarlaıdy.

Ýnıversıtet prezıdenti, profesor Ý.Ábdibekovtiń qabyldaýynda bolǵan QMDB ókili bilim ordasy jaıynda pikir almasty. Dinı basqarmanyń basty mindet-maqsattaryn tanystyryp ótken Baqtybaı Qydyrbaıuly ýnıversıtet rektoryna Qazaqstandaǵy ımamdardyń biliktiligin jetildirý kýrsyn  osy oqý ornynda uıymdastyrýdy usyndy.

Rektor óz kezeginde bul usynysty qabyl alyp, aldaǵy ýaqytta Qazaqstan musylmandar dinı basqarmasymen birlese otyryp ımamdardyń biliktiligin jetildirý kýrsyn ashýǵa ýnıversıttettiń tolyq múmkindigi bar ekenin aıtty, sondaı-aq jemisti jobaǵa árqashan qoldaý kórsetetinin bildirdi. Munymen qatar, ýnıversıtet basshysy Ý.Ábdibekov 2016-2017 oqý jylyna dintaný mamandyǵyna Dinı basqarma tarapynan usynylǵan talapkerlerge 15 grant bóletindigin jetkizdi.

İs-sapar barysynda bólim meńgerýshisi Baqtybaı Qydyrbaıuly bastaǵan top «Túrkistan Ahmet Iassaýı» Quran kýrsy ortalyǵynda bolyp, oqý ordasynyń ǵımaratymen jáne  onyń búgingi jaǵdaıymen tanysty. Atalmysh ortalyq jataqhana, asqana jáne oqý aýdıtorıalarymen tolyqtaı qamtamasyz etilgen eken.

Arnaıy top toǵyz joldyń torabynda ornalasqan Otyrar aýdanyna da at basyn burdy. Onda bólim meńgerýshisi Baqtybaı Qydyrbaıuly «Arystan bab» kesenesine zıarat etip, kesenege qarsy bette ornalasqan «Arystan baba» meshitinde boldy. Sondaı-aq meshitpen qatar boı kótergen rýhanı keshinniń jumysymen tanysty. Onda aldaǵy ýaqytta daıyndyq kýrstaryn ashý máselesine mol múmkindikter bar ekendigine kóz jetkizdi. Aıta keteıik, bul keshen de jataqhana, asqana jáne dárisqanalarmen qamtylǵan.