Bankterdiń bankrottyǵy týraly arandatýshylyq habarlama taratqany úshin 20 táýlikke qamaýǵa alynǵan Darhan Sábdenovtiń Kaspi bank-ke qaryzy bar bolyp shyqty. Bul týraly Almaty qalasy Bostandyq aýdandyq sotynyń anyqtaýy kezinde belgili boldy, dep habarlaıdy Tengrinews.kz tilshisi.
İs materıaldary boıynsha, Kaspi bank Darhan Sábdenovtyń barlyq jyljymaly jáne jyljymaıtyn dúnıe múlkine tyıym salý týraly ótinishpen shyqqan. Sot bul ótinish hatty qanaǵattandyryp, onyń 2 mıllıon teńge bolatyn dúnıe-múlkin tutqynǵa alǵan.
"Bul uıǵarymdy aqtarý Almaty Sot aktilerin oryndaý departamentine júktelsin. Bul uıǵarym dereý oryndalýy tıis", - dep uıǵarymnyń mátininde jazylǵan.
Kaspi bank onyń qalaı qaryzdanǵanyn túsindirdi. Kaspi bank-tiń atqarýshy dırektory Sabyrjan Berkinbaevtyń aıtýynsha, bank shyn máninde Sábdenovke banktik zaemnyń kelisim sharty boıynsha boryshty óndirip alý týraly talap qoıǵan. Óıtkeni ol bankten nesıe alǵan.
"Jaýapker alǵan nesıesin tóleýden taıqyp, jylystap júrgen. Tóleý merzimin 270-ten asa kún ótkizip alǵan. Óziniń mindettemelerin uzaq ýaqytqa oryndamaǵany úshin standartty tártip sheńberinde boryshty óndirip alý, aqy talap etý júzege asyrylǵan",- deıdi ol.
SentrKredıt bankiniń 30 jastaǵy eks-qyzmetkeri Darhan Sábdenovtiń qaýeset taratqan aıyby ashyldy. Oǵan qatysty "Aldaý jáne senimdi aqtamaý saldarynan bireýdiń múlkine zıan keltirý" baby boıynsha ákimshilik is qozǵaldy jáne 20 kúnge qamaýǵa alyndy. Óz kezeginde, zardap shekken bankter iskerlik abyroılaryna nuqsan keltirgeni úshin Sábdenovten keltirilgen zalaldy óndirip alý nıeti bar ekendikterin habarlady.
