Qazaqstandyq ánshi Qaırat Nurtastyń Reseı Federasıasynyń Omby qalasynda ótkizgen konserti jergilikti buqaralyq aqparat quraldarynyń taqyrybyna aınalǵan. Bul týraly baq.kz habarlap otyr.
Omby qalasynyń buqaralyq aqparat quraldary qazaqstandyq ánshi Qaırat Nurtastyń konsertiniń anshlagpen ótkenin erekshe tańdanyspen jazdy. Jergilikti BAQ-tyń jazýyna qaraǵanda, Qaırat Nurtastyń konserti ótetin kúni Omby ortalyq sırk ǵımaratyna kórermender syımaǵan. Bıletter aldyn ala satylyp ketkenine qaramastan sırk ǵımaratynyń aldyna halyq kóp jınalypty. Bılet satyp alýǵa úlgermegen halyq konsertti ǵımarattyń jaqtaýlaryndaǵy balkondardan tik turyp tamashalaǵan. Konsertke jergilikti qazaq ultynyń ókilderimen qatar ózge ulttyń ókilderi de kelgen. Olar ózderin Qaırat Nurtasty súıip tyńdaıtyndyqtaryn aıtyp, onyń ónerin joǵary baǵalaımyz dep jergilikti BAQ-qa suhbattar bergen.
Qaırat Nurtastyń ózi bolsa jergilikti BAQ-ǵa bergen suhbatynda: «Bul meniń Omby qalasynda alǵash ret óner kórsetýim. Ókinishke oraı, meniń josparlarym óte tyǵyz. Alystaǵy aǵaıynǵa kelýge tyryssam da jumys josparlarym oǵan múmkindik bere bermeıdi. Bul qalada óner kórsetý maǵan arman bolatyn. Sebebi, Omby bul qazaqtyń qalasy, qazaqtyń jeri. Aldaǵy ýaqytta osyndaǵy aǵaıyn úshin únemi kelip turýǵa tyrysamyn», — dep oıyn bólisken.
Konsert lazerlik shoýǵa jalǵasyp, konserttiń sońynda ánshiniń anasy, prodússeri Gúlzıra Aıdarbekova Omby turǵyndaryna óziniń alǵysyn bildirgen. Kosert sońynda Qaırat Nurtas: «Aldaǵy ýaqytta Omby qazaqtaryn ózimniń jańa ánderimmen jáne jańadan túsken fılmderimmen qýanta alamyn. Jaqynda meniń qatysýymmen jańa fılm túsiriledi. Fılm meniń ómirim týraly bolady», — dep kórermenderin qýantqan.
Bir qyzyǵy, Reseı jerinde ótken konsert tek qazaq tilinde ótken. BAQ ókilderi konserttiń qazaq tilinde ótýine qatysty «qazaq tilinde ótken konsertke eshqandaı renishter bolǵan joq. Kórermenderdiń kóbi qazaq tilin túsinbese de qazaq ánshisine degen qurmetin kórsetip, ánshiniń qazaq tilindegi aıtqan ánderi men lebizderin jyly qabyldady» dep jazady.
Vahıt NIAZOV,
Nurserik JOLBARYS, Janna SADYQOVA (foto).
Astana — Omby
