AQSH sanksıasy Reseıdiń dollardan bas tartýyna ákep soǵý múmkin dep habarlaıdy RF prezıdentiniń keńesshisi Sergeı Glazevke silteme jasaǵan Tengrinews.kz. Ol AQSH sanksıa engizip jatqan jaǵdaıda Reseı basqa valútalardy tutynyp, ózindik esep-aıyrysý júıesin qurýǵa májbúr bolady dep sanaıdy. "Biz ózindik esep-aıyrysý júıemizdi qurýda basqa valútalarǵa eriksiz kóshe bastaımyz. Bizdiń Shyǵys pen Ońtústiktegi áriptesterimizben saýda-sattyq jáne ekonomıkalyq qarym-qatynasymyz tamasha, biz AQSH-qa qarjylyq táýeldiligimizdi joıyp qana qoımaı, bul sanksıadan ózimiz úshin úlken paıda taýyp shyǵamyz. Reseıge qarsy sanksıa qoldanýdy jarıalaý týraly is-qımyly AQSH-tyń qarjylyq júıesiniń kúıreýi túrinde ózine taıaq bop tıýi yqtımal. Bul AQSH-tyń búkilálemdik qarjy júıesin bılep-tósteýin joıady" deıdi prezıdent keńesshisi. Degenmen Kremldegi joǵary laýazymdy tulǵanyń málimetinshe, Glazevtiń Reseı men AQSH-tyń arasyndaǵy qarjylyq qarym-qatynas týraly bul aıtqany - onyń jeke pikiri ǵana, ol Kreml ustanǵan saıasatqa esh sáıkes kelmeıdi. Buǵan deıin Pentagon Ýkraınadaǵy jaǵdaıǵa qatysty Reseımen áskerı áriptestik baılanysyn doǵardy dep málimdelgen. Bul arada birikken jattyǵýlar jáne bir-biriniń portynda bolýy, ekijaqty kelissózder men konferensıalardy josparlaý jaıy sóz bolǵan. Sondaı-aq AQSH Reseımen saýda-sattyq jáne ınvestısıalyq kelissózderdi de toqtatqan. Eske sala ketelik, Ýkraına mańyndaǵy shıelenistiń ýshyǵýyna baılanysty Reseıge qatysty AQSH-tyń sanksıa qoldaný múmkindigi týraly birneshe márte málimdelgen. Negizinen, AQSH sanksıasy reseılik bankterge engizilýi yqtımal. Vashıngton reseılik memlekettik mekemeler men jeke ınvestorlardyń aktıvterin toqtatyp, sonymen qatar reseılik azamattar úshin vızalyq shekteý qoldanatyndyǵyn aıtyp, doq kórsetken.