اناعا، اناعا، اناعا، تاعى دا اناعا... جاقسىلىق جاسا! ودان كەيىن عانا اسقار تاۋداي اكەڭە قول ۇشىن سوز. وتباسىنىڭ التىن تىرەگى، بىردەن-بىر سايالى بايتەرەگى، قىزعىشتاي قورىعان قامقورشىسى ءارى اۋزىنداعىسىن جىرىپ بەرەتىن اسىراۋشىسى – اكەگە ەمەس، ەڭ الدىمەن، اسىلىم دەپ ارداقتايتىن اناعا كوڭىل ءبول! توعىز اي، توعىز كۇن كوتەرىپ، ءتۇن ۇيقىسىن ءتورت ءبولىپ سەنى ومىرگە اكەلگەن اناڭدى قۇرمەتتە، جاس ۇرپاق! تار قۇرساعىن كەڭىتكەن، تاس ەمشەگىن جىبىتكەن انا مەيىرىمى ادام ساناسىنداعى ەشبىر ولشەمنىڭ اياسىنا سىيمايتىنىن تۇسىنەسىڭ بە؟! الپىس ەكى تامىرىن ءيدىرىپ، كىندىك قانىڭدى تامشىلاتىپ، الاقانىنا ايالاپ كوتەرگەن العاشقى انا قۋانىشىنان، ارينە، سەن بەيحابارسىڭ! ويتكەنى، ول كەزدە ساف اۋانى ەندى عانا جۇتقان ءالسىز شاقالاقتىڭ ءبىرى ەدىڭ. سەن قورعاسىنداي بالقىعان، جىبەكتەي سۋسىمالى، جىلاپ ەمەۋرىن تانىتىپ، جىلاپ تۇياق سەرپيتىن، ساي-سۇيەگىڭ ءالى قاتپاعان ناپ-نازىك ءسابيسىڭ ول ۋاقىتتا. تامشىدان ءتان تۇزگەن قۇدىرەتى كۇشتى اللاعا شەك بار ما، شىركىن. انانىڭ مەيىرىمى مەن انانىڭ قۋانىشىن سەن ءتاي-تاي باسىپ، قاز-قاز تۇرعاندا دا، ويىننان قول بوساماي، شاڭعا بوگىپ اسىر سالعاندا دا، قولىڭا قالام ۇستاپ، قارا تانىعاندا دا، كوپ كاسىپتىڭ بىرىنە كوڭىل ءبولىپ، جاۋاپتى قىزمەتكە قول جەتكىزگەندە دە، سەزىنە المادىڭ، بالكىم. ءيا، ءبىز وتە ءالسىز جاراتىلىسپىز. قازاق قىزىنىڭ كوز جاسىنا، قازاق ايەلىنىڭ مۇڭىنا، قازاق اناسىنىڭ نالاسىنا ىلىكپەيىك، ەركەك كىندىكتى قاۋىم! قىز – ءبىزدىڭ ورىمدەي سۇلۋ تالشىبىعىمىز. ايەل – سۇتتەي ۇيىعان وتباسىنىڭ بەرەكەسى. انا – باۋىر ەتى بالاسى ءۇشىن جانىن قياتىن مەيىرىم يەسى. اجە – ەلىمىزدىڭ ەرتەڭىن قالىپتاستىراتىن جاس ۇرپاقتىڭ اقىلشىسى ءارى رۋحاني تاربيەشىسى. وسىنداي ۇلى ۇعىمعا يە ايەلدەر قاۋىمىن قالايشا قۇرمەتتەمەيسىڭ؟ قالاي عانا ولارعا كوز ساتىپ قاراپ، ءبىر ساتتىك ءناپسىنىڭ قۇربانى ەتەسىڭ؟ ءجۇسىپ بالاساعۇن شەگەلەپ ايتىپ كەتكەن «ايەلدىڭ جالعىز جەتىستىگى – داق تۇسپەگەن ارىنا» جاۋاپكەرشىلىكپەن قارايىق! بۇقار جىراۋ جىرلاعانداي، «قىزدا قىلىق بولماسا، قۇر شىرايدان نە پايدا؟» عابيت مۇسىرەپوۆتىڭ كوركەم ويىنداعى ءتوزىمدى، مەيىرىمدى، پاراساتتى، ۇياتتى انالار جاساسىن! بويجەتكەنگە، جارعا، اناعا جانە قارت اجەگە دەگەن كوزقاراس تۇزەلمەي، قوعامنىڭ نازىك جانعا دەگەن پەيىلى تازارماي، تال بەسىكتەگى تالشىبىقتىڭ بولاشاعى بۇلىڭعىر. بۇگىنگى جاس بۋىن ادامگەرشىلىكتىڭ وسىنداي اسىل قاعيداسىن قاپەرىندە ۇستاسا...

قۋانىش تۇڭعاتار