وقو-دا 6 جاسار مۇحاممەد قامشىبەكتى ۇرلاعان ايەلدىڭ كۇيەۋى ونىڭ كەيبىر ارەكەتتەرىنەن ءوزى قورقاتىنىن ايتقان. اسان وراقبايەۆ ايەلى ءوزىن دە دۋالاپ العان وتىر. بۇل تۋرالى «قامشى» پورتالى TVK-عا سىلتەمە جاساپ حابارلايدى.

ونىڭ ايتۋىنشا، ۇيىندە بوتەن بالانىڭ جۇرگەنىن كورگەندە نە ىستەرىن بىلمەگەن. الايدا، ايەلىنە قارسى ەشتەڭە ايتا الماعان.

«مەن ودان بالانىڭ كىم ەكەنىن سۇراعاندا، ول جيەنىنىڭ بالاسى ەكەنىن ايتتى. مەن ودان «جيەنىڭ كەنتاۋ قالاسىندا تۇرادى ەمەس پە؟» دەسەم، ول بۇل بالانى ءوزى تاۋىپ العانىن، مەنىڭ ارالاسپاۋ كەرەكتىگىمدى ايتتى. ءبىز وسى ءۇشىن ۇرىسىپ تا قالدىق»، – دەيدى اسان وراقبايەۆ.

تۋىستارى 60 جاستاعى بالجاندى سيقىرشى دەپ اتايدى ەكەن. ولاردىڭ ايتۋىنشا، اجەيدىڭ ادامدى دۋالاپ الۋ قاسيەتى بار كورىنەدى.

«بۇل ايەل كوزبايلاۋ قاسيەتىنە يە. ءسىز ونىڭ جانىندا تۇرساڭىز بولدى، ول ءسىزدىڭ سەنىمىڭىزگە كىرىپ، الداپ كەتۋى مۇمكىن. بالجان ۇيىندە ءبىر كۇن عانا بولىپ، سوسىن بىرنەشە ايلاپ جوق بولىپ كەتەدى»، – دەيدى جەزدەسى امان وراقبايەۆ.

تۋىستارىنىڭ ءبىرى ءبۇلدىرشىننىڭ ىزدەۋدەگى بالا ەكەنىن ءبىلىپ، ايتقان دا ەكەن. تۋىستارىنىڭ ايتۋىنشا، اجەيدىڭ كۇيەۋى دەنساۋلىعىنا بايلانىستى اۋىراتىن بولعان.

«10 جىلدان بەرى بالجان ەش جەردە جۇمىس ىستەمەيدى. جۇمىسىندا قىسقارتۋعا ۇشىراپ، سودان بەرى ۇيىندە وتىر. وسىدان كەيىن كۇيەۋىنىڭ دەنساۋلىعى سىر بەرىپ، اۋىرا باستادى. ءتىپتى، ەسىنەن اداسا باستادى. سوعان قاراعاندا، ايەلى ونى دۋالاپ تاستاعان سەكىلدى»، – دەيدى اساننىڭ ءىنىسى جۇمان وراقبايەۆ.

جاقىندا بەلگىلى بولعانداي، بالانى ۇرلاعان كۇدىكتى ايەل 2 ايعا قاماۋعا الىندى. ق ر قك «ادام ۇرلاۋ» بابى بويىنشا تەرگەۋ جۇمىستارى ءجۇرىپ جاتىر. 60 جاستاعى زەينەتكەر ايەلگە 12 جىلعا باس بوستاندىعىنان ايىرىلۋ ءقاۋپى ءتونىپ تۇر.

بۇعان دەيىن 20 اقپان كۇنى مۇحامەدتىڭ جوعالىپ كەتكەنىن، كەيىننەن بالانىڭ تابىلعانىن حابارلاعان ەدىك.

پوليسەيلەردىڭ ايتۋىنشا، اجەي بۇدان بۇرىن دا 3 جاستاعى قىزدى ۇرلاپ كەتىپ، ونى 10 كۇننەن سوڭ قايتارعان.