Forbes جۋرنالى ادەتتەگىدەي الەمدەگى ميللياردەرلەردىڭ ءتىزىمىن جاريالادى، - دەپ حابارلايدى «قامشى» پورتالى.

باسىلىم وتكەن جىلعى عالامدىق داعدارىس، مۇناي باعاسىنىڭ تومەندەۋى مەن دوللار باعامىنىڭ نىعايۋى ميللياردەرلەر قاتارىنىڭ ازايعانىن ايتادى. 2016 جىلعى ميللياردەرلەر تىزىمىنە بارلىعى 1810 ادام ىلىنگەن. بايلار ءتىزىمىن ادەتتەگىدەي مايكراسوفت كومپانياسىنىڭ جەتەكشىسى بيلل گەيتس ($75 ملرد) باستاپ تۇر. وسى رەتتە بىلتىرعى تىزىمگە 1826 ادام كىرگەنىن ايتا كەتكەن ءجون. ال، ءتىزىمنىڭ مۇنشا ادامعا قىسقارۋى 2009 جىلدان كەيىن ءبىرىنشى رەت بولىپ وتىر ەكەن.

الەم ميللياردەرلەرى قاتارىنا قازاقستاندىق بەس ازامات ەنگەن. تىزىمدەگى 771-ورىنعا تۇراقتاعان قازاق ميللياردەرى بولات وتەمۇراتوۆتىڭ جاعدايىن باسىلىم $2،3 ملرد دەپ باعالاعان ەكەن. ول بىلتىرعى جىلى $2،6 ملرد-پەن الەمدىك رەيتينگتە 714-ورىندى باعىندىرعان ەدى.

پرەزيدەنت ن. نازاربايەۆتىڭ ورتانشى قىزى دينارا قۇلىبايەۆا مەن كۇيەۋ بالاسى تيمۋر قۇلىبايەۆ 906-ورىنعا تۇراقتاعان. ولاردىڭ ءارقايسىسىندا $2 ملرد-تان بار كورىنەدى. بىلتىر بۇل جۇپ $2،1 ملرد-پەن الەمدىك رەيتينگتە 894-ورىندى يەلەنگەن ەدى.

ERG ەۋرازيالىق توبىنىڭ باسشىلارىنىڭ ءبىرى ءاليجان يبراگيموۆ ءبىر جىل ىشىندە $700 ملن. جوعالتىپ، العاشقى مىڭدىقتان شىعىپ قالعان. ول $1،5 ملرد بايلىقپەن بيىل 1198-ورىنعا جايعاسىپتى. ءاليجاننىڭ بىلتىرعى كورسەتكىشى $2،2 ملرد (847-ورىن) بولاتىن.

«قازاقمىس» كومپانياسىنىڭ قوجايىنى ۆلاديمير كيم دە $1،5 ملرد-پەن 1198-ورىندى قاناعات تۇتقان. وتكەن جىلى ونىڭ بايلىعى $1،8 ملرد دەپ باعالانىپ، ءتىزىمنىڭ 1054-ورىنى بۇيىرعان ەدى.

باسىلىم قازاقستاندىق ميللياردەرلەردىڭ ءبىر جىل ىشىندە جوعالتقان قاراجاتىنىڭ جالپى جيىنتىعى $1،5 ملرد ەكەنىن ايتادى.