اتىراۋ قالاسىنداعى كەيبىر كوشەلەردە سۋ جايىلا باستادى، - دەپ حابارلايدى «قامشى» پورتالى ازاتتىققا سىلتەمە جاساپ.
اتىراۋ قالاسى دوسسور كوشەسىندەگى 43-ۇيدە تۇراتىن ايگۇل جانعالييەۆا 6 اقپاننان بەرى پاتەرىنىڭ ىشىنەن سۋ شىعا باستاعانىن ايتادى.
- ابدەن بەرەكەمىز كەتتى، ءۇيدىڭ قابىرعالارى ءمۇجىلىپ، قۇلاپ جاتىر. تۇندە قۇدايعا سىيىنىپ ۇيىقتايمىز باسىمىزعا قۇلاي ما دەپ، – دەيدى ايگۇل جانعالييەۆا.
اتىراۋ قالالىق اكىمدىگىنىڭ تۇرعىن ءۇي، كوممۋنالدىق شارۋاشىلىق ءبولىمى باستىعىنىڭ ورىنباسارى ەدۋارد وسپانوۆتىڭ ايتۋىنشا، قالادا سۋ باسىپ جاتقان جەر جالعىز دوسسور كوشەسى ەمەس. قالانىڭ تايمانوۆ كوشەسىن، ەسكى اۋەجاي جانە لەسحوز ءتارىزدى شاعىن اۋداندارىن دا سۋ الىپ كەتكەن.
- ءبىز مۇمكىندىگىنشە سۋدى سوردىرىپ جاتىرمىز. ءبىراق تەحنيكانى الدىمەن ورتالىق كوشەلەرگە، سودان سوڭ جاعدايى جوق ادامدارعا جىبەرەمىز. مۇمكىندىگى بارلار سۋدى وزدەرى تازالاۋى كەرەك، – دەيدى ەدۋارد وسپانوۆ.
پىكىر قالدىرۋ