ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتتەرى بيىل ەلىمىزدە العاش رەت تويلانىپ وتىرعان 1 ناۋرىز – «العىس ايتۋ» كۇنىن ەرەكشە اتاپ ءوتتى. ولار كيەلى قارا شاڭىراق ءال-فارابي اتىنداعى قازۇۋ-عا ءوز  العىستارىن ءبىلدىرۋدى ءجون كورىپ،  «راقمەت» ءسوزى بەينەلەنگەن  فلەشموب ۇيىمداستىردى، - دەپ حابارلايدى «قامشى» پورتالى ۋنيۆەرسيتەتتىڭ باسپا ءسوز قىزمەتىنە سىلتەمە جاساپ.

اسقاق ارماندارى ورىندالىپ، ەلىمىزدەگى ۇزدىك ۋنيۆەرسيتەتكە وقۋعا تۇسكەن ستۋدەنتتەر فلەشموب ارقىلى وزدەرىنە ساپالى ءبىلىم مەن ءتالىمدى تاربيە بەرىپ جاتقان ءبىلىم ورداسىنا، ونىڭ باسشىلىعى مەن بارشا وقىتۋشى پروفەسسورلار قاۋىمىنا شەكسىز العىستارىن جەتكىزۋدى ماقسات ەتتى. 

اسەم الاتاۋ باۋرايىندا ورىن تەپكەن كورىكتى قازۇۋ قالاشىعىندا جاستارعا بارلىق جاعداي جاسالعانىن، سپورتتىڭ كەز كەلگەن تۇرىمەن شۇعىلدانىپ، شىمىر بولۋعا، تىنىش ءارى جايلى ءومىر سۇرۋگە زور مۇمكىندىك بار ەكەندىگىن ماقتانىشپەن ايتا كەلىپ، ستۋدەنتتەر شىن جۇرەكتەن جان-جاقتى دامۋعا جول اشقان ۋنيۆەرسيتەتكە شەكسىز ريزاشىلىقتارىن ايتتى. «ءال-فارابي اتىنداعى قازۇۋ-دا وقىپ، وسى ۋنيۆەرسيتەتتىڭ  تۇلەگى اتانۋ – جارقىن بولاشاققا دەگەن نىق قادام»، – دەدى جاستار.

شارانى قازۇۋ-دىڭ جاستار ۇيىمدارىمەن جۇمىس جونىندەگى ءبولىم مەن جاستار ۇيىمدارى كوميتەتى ۇيىمداستىرىپ، ستۋدەنتتەردىڭ باستاماسىنا قولداۋ ءبىلدىردى.