قازاقستان ۇلتتىق بانكىنىڭ ءتوراعاسى دانيار اقىشيەۆ سەناتتىڭ پلەنارلىق وتىرىسىندا اقپان ايىندا ۆاليۋتا نارىعىنا جاسالعان ينتەرۆەنسيا سوماسىن اتادى، - دەپ حابارلايدى «قامشى» پورتالى.

«سالىقتىق تولەمى كەزەڭىندە، ياعني، اقپان ايىنىڭ سوڭىندا ۇلتتىق بانك نارىقتاعى شەتەلدىك ۆاليۋتا ۇسىنىسىنىڭ اۋقىمدىلىعىنا بايلانىستى شەتەل ۆاليۋتاسىن ساتىپ الۋعا ءماجبۇر بولدى. ناتيجەسىندە 2016 جىلدىڭ اقپانىندا ۇلتتىق بانك 474 ميلليون دوللار اقش ۆاليۋتاسىن ساتىپ الدى. بۇل – 2،4 ميللياردتى قۇرايتىن جالپى ساۋدانىڭ 20 پايىزىنا تەڭ كورسەتكىش. ياعني، ۇلتتىق بانك ۆاليۋتا ساتىپ الۋ ارقىلى التىن-ۆاليۋتا قورىن تولىقتىرىپ وتىر. 2016 جىلدىڭ اقپانىندا ۇلتتىق بانكتىڭ الدىن-الا مالىمەتتەرى بويىنشا التىن-ۆاليۋتا قورى 2،8 پايىزعا ءوسىپ، 27،7 ميلليارد دوللاردى قۇرادى»، - دەدى د. اقىشيەۆ.

باس بانكير ايىرباس باعامىنىڭ ەركىن اينالىمى ساياساتى ودان ءارى جالعاساتىنىن ايتىپ وتىر.

«ءبىر جاعىنان بۇل التىن-ۆاليۋتا اكتيۆتەرىن ساقتاۋعا، ەكىنشىدەن وتاندىق تاۋار وندىرۋشىلەردى قولداۋعا مۇمكىندىك بەرەدى. ۆاليۋتا ايىرباستاۋ باعامىنىڭ ەركىن اينالىمى جاعدايىندا كۇن سايىن ۆاليۋتا باعامىنىڭ وزگەرۋى ورىن الادى. وعان سىرتقى فاكتورلار، ءبىرىنشى كەزەكتە مۇناي باعاسى مەن رەسەي ءرۋبلىنىڭ باعامى اسەر ەتەدى. سونداي-اق، ۆاليۋتا نارىعىنا ىشكى فاكتورلار دا ىقپال ەتەدى. سىرتقى تۇراقسىزدىقتار ساقتالىپ وتىرعان جاعدايدا بۇل ساياسات ءبىر ساتتىك ديەۆالۆاسيا مەن ودان بولاتىن سوققىلاردىڭ الدىن الادى. ءبىز بۇرىنعىداي ۆاليۋتا باعامىن ءبىر دەڭگەيدە ۇستاپ تۇرىپ، ءتۇرلى جاعدايلاردىڭ قىسپاعىنان  شۇعىل ديەۆالۆاسيا وتكىزۋ تاجىريبەسىن توقتاتتىق. ۇلتتىق بانك ەركىن ۆاليۋتا اينالىمى ساياساتىن جالعاستىرادى جانە ۆاليۋتا نارىعىنداعى قارجىلىق تۇراقتىلىققا قاتەر توندىرەتىن شۇعىل تولقۋلار كەزىندە نارىققا ارالاسۋ قۇقىعىنا يە»، - دەيدى ول.