اتىراۋ تۇرعىنى، التى بالانىڭ اناسى ساندۋعاش ءىزباسوۆا تۇرمىستىق قيىندىقتار سالدارىنان ءۇش بالاسىن قالالىق ينتەرناتقا وتكىزۋگە ءماجبۇر بولعان، - دەپ حابارلايدى «قامشى» پورتالى sn.kz – كە سىلتەمە جاساپ.

اتىراۋلىق ءبۇلدىرشىن بەكبول جاقسىبايەۆتىڭ ءبىر عانا ارمانى بار. ول ءوز اناسىمەن جانە قالعان بەس باۋىرىمەن ءبىر شاڭىراق استىندا ءومىر ءسۇرۋدى قۇدايدان كۇنى-تۇنى تىلەيدى. ماتەريالدىق جاعدايدىڭ تىم اۋىرلىعىنا بايلانىستى اناسى ساندۋعاش ءىزباسوۆا ءۇش ۇلىن اتىراۋداعى قالالىق ينتەرناتقا وتكىزىپ جىبەرگەن. ويتكەنى، اشتان ءولتىرىپ الامىن با دەپ قورقادى.

ساندۋعاشتىڭ كۇيەۋى وسىدان بىرەر جىل بۇرىن ومىردەن قايتقان. التى بالامەن جالعىز قالعان ايەلدىڭ نە باسپاناسى، نە تۇراقتى جۇمىسى جوق، اۆتوبۋستاردا كوندۋكتور بولىپ جان باعادى. ءقازىر قالا ىرگەسىندەگى الاقانداي ءبىر بولمەلى جەر ءۇيدى جالعا الىپ تۇرىپ جاتىر. سوڭعى ۋاقىتتا ءتىپتى، ىشەرگە تاماق تاپپاي قالاتىن كەزدەر بولادى دەيدى ول. سوندىقتان ۇلكەن ءۇش بالاسىن ينتەرناتقا وتكىزۋگە ءماجبۇر بولعان.

كوپبالالى وتباسىنىڭ وسىناۋ اۋىر تاعدىرى كوپشىلىككە بەيمالىم بولىپ قالا بەرۋى مۇمكىن ەدى. ءبىراق، كىشكەنتاي بەكبولدىڭ "قازاقستاننىڭ ءبىرىنشى ارناسىنا" جازعان حاتى ءبىراز ادامنىڭ كوڭىلىنە مۇڭ ءتۇسىردى. ول ءوز حاتىندا اناسىنان جانە وزگە باۋىرلارىنان اجىراپ قالعانىن ايتىپ، كوپشىلىكتەن كومەك سۇراعان. اناسى ساندۋعاش تا ب ا ق وكىلدەرى ارقىلى حالىقتان قول ۇشىن بەرۋدى ءوتىنىپ وتىر. ويتكەنى، كوپبالالى باتىر انا جەرگىلىكتى بيلىك وكىلدەرىنەن ابدەن ءۇمىتىن ۇزگەن ەكەن.

- مەن جالعىزباستى انامىن. ءبىر بولمەلى كىشكەنتاي ءۇيدى جالعا الىپ تۇرىپ جاتىرمىن. بالالارىمدى اسىراۋعا مۇلدەم جاعدايىم جوق، سوندىقتان ولاردى ينتەرناتقا وتكىزۋگە ءماجبۇر بولدىم. سەنسەڭىزدەر، جاعدايىم وتە مۇشكىل. الاتىن جاردەماقىمنىڭ تەڭ جارتىسىن باسپاناعا تولەسەم، جارتىسى تاماققا جەتپەي قالادى. ال، بالالاردى كيىندىرۋگە مۇلدەم جاعداي جوق. تىم اۋىر حالدە بولعاندىقتان امالسىز حالىقتان كومەك سۇراپ وتىرمىن، - دەيدى كوپبالالى انا ساندۋعاش ءىزباسوۆا.

ساندۋعاش كۇيبەلەڭ تىرلىكتەن ءبىر ساتكە بوساي قالسا بالالارى جاتقان ينتەرناتقا شاۋىپ كەلەدى. ءبىراق مۇنداي كۇندەر ءجيى قايتالانا بەرمەيدى دەيدى ول. ءار كەلگەن سايىن كەۋدەسىنە تىعىلعان وكسىكتى سىرتقا شىعارماۋعا تىرىسادى ەكەن. ويتكەنى، ونسىز دا جالتاقتاپ جۇرگەن بالالارىنىڭ الدىندا ايەل مىقتى بولۋى ءتيىس. 

ساندۋعاشتىڭ جەرگىلىكتى بيلىكتەن ءۇمىتىن ءۇزۋى بەكەر ەمەس. ول بۇعان دەيىن اتىراۋ قالالىق اكىمدىگىنىڭ تابالدىرىعىن تالاي توزدىرىپتى. سونداعى سۇراعانى باسپانا عانا. الايدا، ءۇيدى تەك كەزەكپەن بەرەتىنىن ايتقان شەنەۋنىكتەر كوپبالالى جالعىزباستى اناعا ەش كومەك كورسەتپەگەن.

- ءىزباسوۆا ساندۋعاش ءۇي كەزەگىنە كوپبالالى انا رەتىندە تۇردى. ءقازىر ونىڭ كەزەگى 1982ء-شى، - دەيدى اتىراۋ قالالىق تكش سەكتورىنىڭ مامانى رادميرا سيساتوۆا.

ياعني، كەزەكتىڭ جىلجۋ قارقىنىنا قاراساق ساندۋعاش الداعى 2-3 جىلدا باسپانالى بولا المايدى.

جەسىر ايەل اندا-ساندا ينتەرناتتاعى ۇلدارىن ۇيىنە اكەپ، بالا-شاعانىڭ باسىن قوسىپ تۇرادى. ءبىراق، مۇنداي كۇندەر وتە سيرەك بولعاندىقتان ونىڭ ءاربىر مينۋتى التىنمەن تەڭ.

- ومىردەن ءتۇڭىلىپ كەتەمىن. ءبىراق، مىنا التى بالانى جەتىلدىرۋ كەرەك، وسىلار ءۇشىن ءومىر ءسۇرىپ ءجۇرمىن. قاتتى جانىم قينالعاندا بالالارىمنىڭ كوزىنە قاراپ، بۇكىل شارشاۋىمدى باسامىن، - دەيدى س.ءىزباسوۆا.

جالعىزباستى اناعا كومەكتەسكىسى كەلەتىن جاندار تابىلىپ جاتسا ساندۋعاشتىڭ ۇيالى تەلەفونىنا حابارلاسۋىنا بولادى: 8 702 31 11 906.