العاشقى رەت ءال-فارابي اتىنداعى قازۇۋ بازاسىندا ءال-فارابي كىتاپحاناسىندا قازاقستان مەديسينالىق زەرتحانالىق دياگنوستيكا قاۋىمداستىعىنىڭ (قمزدق) IV حالىقارالىق كونگرەسى ءوتتى. ەكى كۇندىك جيىنعا رەسەي، اقش، فرانسيا جانە قازاقستاننىڭ بارلىق ايماقتارىنان كەلگەن مەديسينالىق كاسىبي ءبىلىم بەرۋ سالاسىنداعى ماماندار قاتىستى، - دەپ حابارلايدى «قامشى» پورتالى.

«زاماناۋي زەرتحانالىق مەديسينا: زەرتحانالىق تالداۋدىڭ يننوۆاسيالىق تەحنولوگيالارى جانە ولاردى قازاقستاندا كلينيكالىق قولدانۋدىڭ جاڭا مۇمكىندىكتەرى» دەگەن اتاۋمەن باستاۋ العان كونفەرەنسيا وتىرىسىنىڭ نەگىزگى وزەگى زەرتحانا قىزمەتكەرلەرىن دايارلاۋداعى كاسىپتىك جانە ءبىلىم بەرۋ ستاندارتتارىن ازىرلەۋ ماسەلەسى توڭىرەگىندە ءوربىدى.

ءال-فارابي اتىنداعى قازۇۋ، نازاربايەۆ ۋنيۆەرسيتەتى مەن س.د. اسفەندياروۆ اتىنداعى قازۇمۋ-دان كەلگەن قاتىسۋشىلار ەلىمىزدە مەديسينا سالاسىنىڭ ماماندارىن دايارلايتىن ۇزدىك وقۋ ورىندارىنىڭ ءبىرى بولعاندىقتان، ءوز تاجىريبەلەرىن ورتاعا سالۋعا دايىن ەكەندىكتەرىن جەتكىزدى. سونىمەن قاتار، رەسەي مەديسينالىق زەرتحانالىق دياگنوستيكا قاۋىمداستىعى (رمزدق) پرەزيدەنتى د.ب.ساپرىگيننىڭ سالەمدەمەسىن الىپ كەلگەن وسى مەكەمەنىڭ ۆيسە-پرەزيدەنتى الەكساندر گيلمانوۆ زاماناۋي زەرتحانالىق مەديسينا ماسەلەسى ەكى ەلدە دە ۇقساس جاعدايدا ەكەنىنە نازار اۋدارتتى. «ءبىز، قازاقستانمەن جەمىستى جۇمىس اتقارىپ كەلەمىز. بەلگىلى سالالاردا قوردالانعان ماسەلەلەر از ەمەس. ولاردى ورتاقتاسىپ، بىرىگىپ شەشكەن دۇرىس»، – دەدى پروفەسسور الەكساندر گيلمانوۆ. ەلدىڭ تۇكپىر-تۇكپىرىنەن جانە شەتەلدەن كەلگەن بيومەديسينا جانە زەرتحانالىق دياگنوستيكا سالاسىنىڭ عىلىمي قىزمەتكەرلەرى كونفەرەنسيا جۇمىسى بارىسىندا تاجىريبە الماسىپ، جاڭادان ەنگىزىلگەن يننوۆاسيالىق تەحنولوگيالار تۋرالى ءبىرسىپىرا مالىمەتتەردەن قۇلاعدار بولدى.

قۇرىلعانىنا 5 جىل تولعان قمزدق اتالمىش ءىس-شارانى جىل سايىن وتكىزۋدى داستۇرگە اينالدىرعان. بيىلعى جيىننىڭ قازۇۋ بازاسىندا ۇيىمداستىرىلۋى جانە ۇزدىك ۋنيۆەرسيتەتتەردىڭ جەتەكشى عالىمدارىنىڭ قاتىسۋى، عىلىمنىڭ جاڭا تۇرلەرى مەن بيومەديسينانىڭ جاڭا بۋىن زەرتحانا ماماندارىن حالىقارالىق ستاندارتتار نەگىزىندە دايىندالۋى قازاقستاندا بيومەديسينا سالاسىنىڭ دامۋىنا جاڭا سەرپىن مەن تىڭ يدەيالار بەرەرى حاق.