بۇگىن قازاقستان رەسپۋبليكاسىنىڭ ۇلتتىق ۇلانى «وڭتۇستىك» وڭىرلىك قولباسشىلىعىندا 8 ناۋرىز - حالىقارالىق ايەلدەر كۇنىنە ارنالعان سالتاناتتى جيىن ءوتتى، - دەپ حابارلايدى «قامشى» پورتالى.

قىزىعى مەن قيىندىعى قاتار جۇرەتىن اسكەري قىزمەتتىڭ سۋىعى مەن ىستىعىنا ءتوزىپ جۇرگەن ۇلتتىق ۇلان اسكەري بولىمدەرىنىڭ باتىل قىزدارىن «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور الىبەك سەرالييەۆ قۇتتىقتاپ، اسكەري قىزمەتشى ايەلدەر قاۋىمىنىڭ جەتكەن جەتىستىكتەرىن اتاپ ءوتتى. ءوز سوزىندە قولباسشى: «ۇلتتىق ۇلان قاتارىنداعى ەرلەرمەن تەڭ قارۋ اسىنىپ جۇرگەن ارۋلار ەش قايمىقپاستان، تاۋلىكتىڭ كەز كەلگەن ۋاقىتىندا وزدەرىنە جۇكتەلگەن تاپسىرمالار مەن مىندەتتەردى ادال اتقارىپ ءجۇر. ءوز ومىرلەرىن وتان قورعاۋ جولىنا  ارناپ،  ەر ادامدارمەن قاتار قاتاڭ اسكەري ءتارتىپتىڭ قۇرىشىندا بولات بوپ قايناعان وسىنداي باتىل دا قايسار ايەلدەردى كەشەگى حيۋاز، مانشۇك، ءالياداي قازاق باتىر قىزدارىنىڭ ءداستۇرلى جالعاسى دەپ بىلەمىن» - دەپ جۇرەكجاردى تىلەكتەرىن ارناعان سوڭ، قازاقستان رەسپۋبليكاسى ىشكى ىستەر ءمينيسترىنىڭ، ۇلتتىق ۇلان باس قولباسشىسىنىڭ جانە وڭىرلىك قولباسشىلىقتىڭ بۇيرىعىمەن ماراپاتتالعان ۇزدىك اسكەري قىزمەتشى ارۋلارعا  گراموتالار مەن كەۋدە بەلگىلەرىن تابىس ەتتى.

وسى جيىنعا ارنايى كەلگەن قازاقستان رەسپۋبليكاسى گەنەرالدار كەڭەسى پرەزيديۋمىنىڭ مۇشەسى، ۇلتتىق ۇلان «وڭتۇستىك» وڭىرلىك قولباسشىلىعى ارداگەرلەر كەڭەسىنىڭ تالىمگەرى وتستاۆكاداعى پولكوۆنيك يۆان كوماروۆ تا ۇلتتىق ۇلاننىڭ زەينەتكەر ايەلدەرى مەن ەل باسىنا كۇن تۋسا، ەتىگىمەن سۋ كەشۋگە ءازىر ارۋلاردى كەلە جاتقان ءتول مەرەكەلەرىمەن قۇتتىقتاپ، ارداگەرلەر كەڭەسىنىڭ اتىنان ولاردىڭ ومىراۋلارىنا ەستەلىك كەۋدە بەلگىلەرىن تاقتى. 

اتاپ وتكىمىز كەلەتىنى، ۇلتتىق ۇلان قاتارىندا ون جىلدان استام قىزمەت ەتىپ، وفيسەرلىك لاۋازىمنىڭ ناعىز مامان كادرىنا اينالعان «وڭتۇستىك» وڭىرلىك قولباسشىلىعى تاربيە جانە الەۋمەتتىك-قۇقىقتىق جۇمىستار باسقارماسىنىڭ اعا وفيسەرى  كاپيتان دانارا بايماعانبەتوۆاعا قازاقستان رەسپۋبليكاسى ىشكى ىستەر ءمينيسترىنىڭ بۇيرىعىمەن مەرزىمىنەن بۇرىن «مايور» اسكەري شەنى بەرىلگەن بولاتىن، ونى وسى جيىندا وڭىرلىك قولباسشىلىقتىڭ قولباسشىسى الىبەك بولات ۇلى سالتاناتتى تۇردە تابىس ەتتى.

بۇگىندە قازاقستان رەسپۋبليكاسى ۇلتتىق ۇلان «وڭتۇستىك» وڭىرلىك قولباسشىلىعىنا قاراستى اسكەري بولىمدەردە بارلىعى 380-نەن استام قىز-كەلىنشەك ەرلەرمەن يىق تىرەستىرىپ قىزمەت ەتۋدە. ءتۇرلى قىزمەتتەگى ماماندار، باقىلاۋ-وتكىزۋ پۋنكتىنىڭ ساقشىسى، مامان-وپەراتور، ءبولىنىس فەلدشەرى، قويما باستىعى، تاعى باسقا لاۋازىمدارداعى نازىك جاندىلار وزدەرىنە جۇكتەلگەن تاپسىرمالاردى ابىرويمەن ورىنداپ، ارىپتەستەرى مەن قولباسشىلىق الدىندا زور قۇرمەت يەلەنۋدە.