وسى اپتادا ەلباسى نۇرسۇلتان نازاربايەۆتىڭ وكىمىمەن ەلىمىزدىڭ سىرتقى ىستەر ءمينيسترىنىڭ ءتورت ورىنباسارى بىردەن اۋىستى. سونداي-اق قازاقستاننىڭ دۇنيەجۇزىلىك ساۋدا ۇيىمىنا كىرۋىنە زور ەڭبەك سىڭىرگەن جانار ايتجانوۆا شۆەيسارياداعى ەلشى بولىپ تاعايىندالدى، - دەپ حابارلايدى «قامشى» پورتالى قازاقپاراتقا سىلتەمە جاساپ.
سونىمەن قازاقستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى قىزمەتىنە مۇحتار بەسكەن ۇلى تىلەۋبەردى تاعايىنالدى. ول وڭتۇستىك قازاقستان وبلىسىندا دۇنيەگە كەلگەن. قازاق مەملەكەتتىك ۋنيۆەرسيتەتىن بىتىرگەن. اعىلشىن، كورەي جانە جاپون تىلدەرىن جەتىك بىلەدى. 1993 جىلدان بەرى ەلىمىزدىڭ سىرتقى ىستەر مينيسترلىگى جۇيەسىندە جۇمىس ىستەگەن.
كەلەسى ۆيسە-مينيستر اقىلبەك ءابسات ۇلى كامالدينوۆ دە وڭتۇستىك قازاقستان وبلىسىندا تۋعان. قازاق مەملەكەتتىك ۋنيۆەرسيتەتىن بىتىرگەن. 2007 جىلدان بەرى قازاقستاننىڭ جاپونياداعى توتەنشە جانە وكىلەتتى ەلشىسى بولعان.
ال ۆيسە-مينيستر عالىمجان تەلمان ۇلى قويشىبايەۆ قىزىلوردا وبلىسىندا دۇنيەگە كەلگەن. م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىن ءتامامداعان. فيلوسوفيا عىلىمدارىنىڭ كانديداتى. 2009 جىلدان قازاقستاننىڭ لاتۆيا رەسپۋبليكاسىنداعى توتەنشە جانە وكىلەتتى ەلشىسى قىزمەتىن اتقارعان.
ق ر ءسىم ۆيسە-مينيسترى رومان يۋريەۆيچ ۆاسيلەنكو شىمكەنت قالاسىندا دۇنيەگە كەلگەن. رەسەي قارۋلى كۇشتەرىنىڭ ەكونوميكا، قارجى جانە قۇقىق اسكەري اكادەمياسىن بىتىرگەن. 2014 جىلدان بەرى ق ر ءسىم حالىقارالىق اقپارات كوميتەتىنىڭ ءتوراعاسى بولدى.
ال جانار ايتجانوۆا قازاق مەملەكەتتىك ۋنيۆەرسيتەت، بىرىككەن ۆەنا ينستيتۋتىن، گارۆارد ۋنيۆەرسيتەتىنىڭ كەننەدي اتىنداعى مەملەكەتتىك باسقارۋ مەكتەبىن بىتىرگەن. 2011 جىلدان بەرى ەلىمىزدىڭ ەكونوميكالىق ينتەگراسيا ىستەرى ءمينيسترى بولىپ، قازاقستاننىڭ دۇنيەجۇزىلىك ساۋدا ۇيىمىنا كىرۋىنە زور ەڭبەك سىڭىرگەن.
ءۇنزيلا شاپاق ق ر كونستيتۋسيالىق كەڭەس مۇشەسى بولىپ تاعايىندالدى. ول 1973 جىلى تۋعان، جوعارى زاڭگەرلىك ءبىلىمى، زاڭ عىلىمدارىنىڭ دوكتورى عىلىمي دارەجەسى بار. 2011 جىلدان بەرى «قازاق مەملەكەتتىك زاڭ ۋنيۆەرسيتەتى» اق جوعارعى قۇقىق مەكتەبىنىڭ ديرەكتورى قىزمەتىن اتقارىپ كەلگەن.
ۇزاقباي قارابالين «KAZENERGY» قاۋىمداستىعى ءتوراعاسىنىڭ ورىنباسارى بولىپ تاعايىندالدى. ول 1947 جىلى 14 قازاندا اتىراۋ وبلىسى ەمبى اۋدانى قوسشاعىل كەنتىندە دۇنيەگە كەلگەن. 1970 جىلى ي.م. گۋبكين اتىنداعى ماسكەۋ مۇناي-حيميا جانە گاز ونەركاسىبى ينستيتۋتىن «مۇناي مەن گاز كەنىشتەرىن يگەرۋدىڭ كەشەندى مەحانيكالاندىرۋ جانە تەحنولوگياسى» ماماندىعى بويىنشا ءتامامداعان. قازاقستان رەسپۋبليكاسى ۇلتتىق ينجەنەرلىك اكادەميانىڭ اكادەميگى، 40-تان استام ماقالا، كىتاپ، 5 ونەرتاپقىشتىق جاڭالىقتىڭ اۆتورى. قازاقستاننىڭ ەڭبەك ەرى.
3-دارەجەلى «بارىس» وردەنىمەن (2005 ج.)، «قۇرمەت» وردەنىمەن (2000 ج.)، «وتليچنيك رازۆەدكي نەدر سسسر» بەلگىسىمەن (1988 ج.)، «قازاقستان كونستيتۋسياسىنا 10 جىل» مەرەيتويلىق مەدالىمەن (2005 ج.)، «قازاقستان رەسپۋبليكاسىنىڭ پارلامەنتىنە 10 جىل» مەرەيتويلىق مەدالىمەن (2006 ج.)، «ليدەر روسسييسكوي ەكونوميكي» وردەنىمەن (2005 ج.)، قازاقستان رەسپۋبليكاسى جەر قويناۋىننىڭ قۇرمەتتى بارلاۋشىسى» (2003 ج.) اتاعىمەن ماراپاتتالعان.
پىكىر قالدىرۋ