رەسەيلىك وليمپيادا چەمپيونى پاۆەل پينيگين ياكۋتيادا وتكەن ەركىن كۇرەستەن حالىقارالىق تۋرنير سوڭىەدا سۋرەتكە ءتۇسۋ ساتىندە قازاقستاندىق سپورتشىنى يتەرىپ جىبەردى، - دەپ حابارلايدى «قامشى» پورتالى.

بولعان وقيعا تۋرالى ۆيدەو ءبىرقاتار الەۋمەتتىك جەلىلەردە جاريالاندى.

رەسەيلىك باسىلىمدار «تريۋمف» سپورت كەشەنىنىڭ جەتەكشىسى پاۆەل پينيگين قازاقستاندىق سپورتشىمەن قاتار تۇرىپ سۋرەتكە ءتۇسۋدى نامىس كوردى دەپ جازدى.

الايدا، ياكۋتيا سپورت ءمينيسترى ميحايل گۋليايەۆ NVPress باسىلىمىنا بەرگەن تۇسىنىكتەمەسىندە بولعان جاعدايدى جاي عانا سپورتتىق ەتيكانى بۇزۋ دەپ باعالاپ، پ. پينيگيندى اقتاپ شىققان.

«ماراپاتتاۋ ساتىندە ارتىق ادامدار بولماۋى كەرەك. جاس سپورتشى مۇنى بىلمەگەن سىڭايلى. پاۆەل پاۆلوۆيچ ءىس-شارانى باسقارۋشى رەتىندە وعان سپورت ەتيكاسىنىڭ وسى تالابىن ءتۇسىندىردى»، - دەپ «تاپسىرلەيدى» پانيگيننىڭ پاڭدىعىن ياكۋتيا سپورت ءمينيسترى.

پانينگيننىڭ ءوزى دە بولعان وقيعا تۋرالى بىلاي دەپ تۇسىنىك بەرگەن:

«جۇلدەلەر تاپسىرۋ ءساتىن سۋرەتكە ءتۇسىرۋ كەزىندە قازاقستان قۇراماسىنىڭ مۇشەسى كادرعا ورشەلەنە ۇمتىلا بەردى. مەن وعان ەسكەرتۋ جاسادىم. سپورتتىق ەتيكانى بۇزعانىن ايتىپ، ماراپاتتاۋ راسىمىنە ارالاسپاۋىن سۇرادىم. ول تىڭدامادى، سوسىن كىشكەنە يتەرىپ جىبەرۋگە تۋرا كەلدى».

وسىلايشا، رەسەيلىكتەر ۇيىمداستىرعان سپورت جارىسىندا قوناقتاردى كەۋدەسىنەن يتەرۋ وقيعاسى ورىن العان.