جۇڭگو حالىق رەسپۋبليكاسىنىڭ قازاقستانداعى ەلشىسى چجان حانحوي استانادا ب ا ق وكىلدەرىمەن كەزدەسۋدە ەكى ەل اراسىنداعى ۆيزالىق رەجيم ساياساتىنا قاتىستى پىكىرىن ءبىلدىرىپ، قازاق بيلىگىنىڭ ارەكەتىن سىنعا الدى، - دەپ حابارلايدى «قامشى» پورتالى.
جۇڭگو تارابى قازاق بيلىگىنەن ۆيزا راسىمدەۋدىڭ ءتارتىبىن جەڭىلدەتۋدى تالاپ ەتۋدە. استانادا قازاقستاندىق ب ا ق وكىلدەرىمەن جۇزدەسكەن قحر-دىڭ قازاقستانداعى توتەنشە جانە وكىلەتتى ەلشىسى چجان حانحوي جۇڭگو ديپلوماتتارىنىڭ ۆيزالارىن راسىمدەۋگە بايلانىستى قازاقستان باسشىلارىن سىنعا الدى. ەلشىنىڭ ايتقان سوزدەرى جازىلعان ۆيدەو عالامتوردا تاراپ ءجۇر.
«ءبىز قازاقستاندى ءوزىمىزدىڭ ادال دوسىمىز، سەنىمدى ارىپتەسىمىز، ماڭىزدى كورشىمىز دەپ سانايمىز. قازاقستاننىڭ پرەزيدەنتىن ءبىزدىڭ ءتوراعانىڭ دوسى دەپ بىلەمىز. ونىڭ ىشكى، سىرتقى ساياساتىن قولدايمىز. ءبىز قازاقستان ۇكىمەتىن قولدايمىز، ءسىزدىڭ حالىقتى قولدايمىز» دەگەن ەلشى قىتايدىڭ ەكونوميكالىق، باسقا دا الەۋەتىن العا تارتا كەلە، ۆيزا راسىمدەۋ تارتىبىنە قاتىستى قازاقستان بيلىگىنە قوقان-لوققىعا ۇقساس سوزدەر ايتقان.
«ولار (قازاقستان بيلىگى – رەد.) كىممەن بەتپە-بەت كەلىپ وتىرعاندارىن بىلە مە؟ جۇڭگو – سىزدەردىڭ كورشىلەرىڭىز، ول ەشقاشان قازاقتار مەن قازاقستاننىڭ مۇددەلەرىنە قول سۇقپادى، وسى ۇلتتىڭ، وسى حالىقتىڭ گۇلدەنىپ تۇرعان شاعىندا دا شابۋىل جاساماعان. ول بۇۇ قاۋىپسىزدىك كەڭەسىنىڭ تۇراقتى مۇشەسى. ول – ستراتەگيالىق ارىپتەس، ءقازىر «وتە ماڭىزدى» دەگەن ءسوزدى قوسا ايتىپ ءجۇرمىز. ال، سىزدەر ۆيزا راسىمدەۋ ماسەلەسىندە قورلايتىن ادىستەرگە جۇگىنىپ وتىرسىزدار»، - دەيدى ەلشى.
جۇڭگو ەلشىسى ءوز ەلىنىڭ ديپلوماتتارى قازاقستانعا كەلۋ ءۇشىن اشىلاتىن ۆيزانىڭ تەك ءۇش اي مەرزىممەن شەكتەلگەنىنە نارازىلىق ءبىلدىرىپ، بۇل ەلشىلىك قىزمەتكەرلەرىنىڭ قىزمەتى مەن تۇرمىسىنا قولايسىزدىق تۋعىزادى دەپ وتىر.
ال، بۇعان دەيىن شىعىس قازاقستان وبلىسىندا بولعان شىڭجاڭ ۇيعىر اۆتونوميالىق ولكەسى ۇكىمەتى باسشىسىنىڭ ورىنباسارى شي داگان 50 ادامعا دەيىنگى قىتايلىق تۋريستەر توبىن قازاقستانعا ۆيزاسىز كەلۋ مۇمكىندىگىن قاراستىرۋدى سۇراعان ەدى.
ۆيدەو ratel.kz سايتىنان الىندى.
پىكىر قالدىرۋ