شىمكەنت سىرا زاۋىتىنىڭ 35 جۇمىسشىسى بۇگىن ەرەۋىلگە شىقتى، - دەپ حابارلايدى «قامشى» پورتالى.

زاۋىت باسشىلىعىنا نارازىلىق بىلدىرۋشىلەر وزدەرىنىڭ ءۇش ايدان بەرى ەڭبەكاقىلارىن الا الماي وتىرعاندارىن ايتادى. ولاردىڭ ايتۋىنشا، جالاقى بويىنشا زاۋىت ءار جۇمىسشىعا ورتا ەسەپپەن 150-200 مىڭ تەڭگە قارىز كورىنەدى. جۇمىسشىلاردىڭ كەيبىرى زاۋىت قوجايىنى تۇتقىندالعان سوڭ، ەڭبەكاقىدان ءۇمىتىن ءۇزىپ، جۇمىستان شىعىپ كەتىپتى.

«ءبىز بار بولعانى ەڭبەكاقىمىزدىڭ تولەنۋىن تالاپ ەتەمىز. باسقا ەشتەڭە كەرەك ەمەس. ءقازىر وتكەن جىلعى جەلتوقسان ايى، بيىلعى قاڭتار، اقپان ايلارى ءۇشىن 35 جۇمىسشى جالاقىلارىن الا المادى. ءبىرازىن باسشىلىق اقىسىز دەمالىسقا جىبەردى، كەيبىرەۋىن جۇمىستان شىعاردى. ال، كەيبىرەۋلەر ءوز ەركىمەن جۇمىستان كەتتى. ءبىزدىڭ بارلىعىمىزدىڭ وتباسىمىز بار. ولاردى قالاي دا اسىراۋ كەرەك. ءبىزدىڭ تالاپتارىمىزعا وڭ كوزقاراس تانىتۋدى جانە ادال ەڭبەكاقىمىزدىڭ تولەنۋىن سۇرايمىز»، - دەيدى كۇزەتشى بولىپ جۇمىس ىستەيتىن شالقار بايزاقوۆ.

الايدا، زاۋىت باسشىلىعى كۇزەتشىلەرگە قاتىسىمىز جوق دەپ وتىر. كۇزەتشىلەر بولسا، وزدەرى جۇمىس ىستەيتىن «ۆىمپەل» كۇزەت فيرماسى مەن سىرا زاۋىتىنىڭ قۇرىلتايشىسى ءبىر ادام ەكەنىن ايتۋدا.

وقيعا ورنىنا كەلگەن وقو بويىنشا باس مەملەكەتتىك ەڭبەك ينسپەكتورى باستار ەسقارايەۆ جۇمىسشىلاردى سابىرعا شاقىرىپ، ولاردىڭ ارىزدارىن جيناپ الىپ كەتكەن.

ب. ەسقارايەۆتىڭ ايتۋىنشا، زاۋىت وسى ۋاقىتقا دەيىن جۇمىسشىلارىنا 27 ميلليون تەڭگە جالاقى قارىز بولىپ كەلگەن. بۇل سوما بۇگىندە تولىق وتەلگەن كورىنەدى.

ەستەرىڭىزگە سالساق، زاۋىت قۇرىلتايشىسى، بەلگىلى كاسىپكەر توقتار تولەشوۆ اقپان ايىنىڭ باسىندا قىلمىستىق كودەكستىڭ بىرنەشە بابى بويىنشا ايىپتالىپ، تۇتقىنعا الىنعان بولاتىن.