ءماسليحات دەپۋتاتتىعىنا وزدەرىنىڭ كانديداتۋراسىن ۇسىنعان 300 ۇمىتكەر بۇگىندە سايلاۋ دوداسىنان شىعارىلىپ تاستالدى. جەر-جەرلەردەگى سايلاۋ كوميسسيالارى ۇمىتكەرلەردىڭ وتكىزگەن تابىس دەكلاراسيالارىنان كىنارات تاۋىپ، ءوزىن-وزى ۇسىنعانداردى ساياسي دوداعا قاتىسۋدان شەتتەۋدە. وسىنداي سايلاۋدان شەتتەتلگەن ۇمىتكەرلەردىڭ ءبىر توبى پرەزيدەنتتىڭ ماسەلەنى شەشۋگە ارالاسۋىن سۇراپ، ۇندەۋ دە جاسادى.

سايلاۋ كوميسسيالارى مەن ۇمىتكەرلەر شاعىمدانعان زاڭ ورىندارى بۇل جاعدايدى قولدانىستاعى زاڭنامالارعا سايكەس انىقتالىپ وتىرعان كەمشىلىكتەر ناتيجەسىندە بولعان قالىپتى وقيعا دەسە، دودادان شەتتەتىلگەن  ۇمىتكەرلەر مەن قوعام بەلسەندىلەرى «نۇر وتان» پارتياسىنىڭ ۇمىتكەرلەرىن عانا جەرگىلىكتى وكىلەتتى ورگانعا وتكىزۋ ماقساتىندا بيلىكتىڭ قاساقانا جاساپ وتىرعان قيتۇرقىلىعى دەپ باعالاۋدا. ءتۇرلى وبلىستار مەن استانا قالاسىنداعى سايلاۋ كوميسسيالارى كىرىس تۋرالى دەكلاراسيالارىنان كىنارات تاۋىپ، سايلاۋدان شەتتەتكەن ۇمىتكەرلەر الەۋمەتتىك جەلىلەر مەن تاۋەلسىز ب ا ق ارقىلى دابىل قاعۋدا. ونداي ۇمىتكەرلەردىڭ اراسىندا تەك بيلىكتى اشىق سىناپ جۇرگەن وپپوزيسيالىق ۇستانىمداعى ازاماتتار عانا ەمەس، ءوزىن-وزى ۇسىنعان بيلىك پارتياسىنىڭ مۇشەلەرى دە بار. ماسەلەن، استانا قالالىق ءماسليحاتى دەپۋتاتتىعىنا ۇمىتكەر، بۇرىنعى ءماجىلىس دەپۋتاتى، كۆن قوزعالىسىنىڭ بەلدى جانكۇيەرى باقىت سىزدىقوۆا دا تابىس دەكلاراسياسى كەسىرىنەن سايلاۋدان الىنىپ تاستالىپ وتىر. اقپارات قۇرالدارى ونىڭ دەكلاراسيادا 6 تەڭگە كەم كورسەتكەنىن جازۋدا.

وڭىرلەردە ورىن الىپ وتىرعان وسىنداي كەلەڭسىزدىكتەرگە كۇيىنگەن كتك تەلەارناسىنىڭ بۇرىنعى باسشىسى، تانىمال جۋرناليست ارمان شۋرايەۆ مۇنداي سايلاۋدى وتكىزبەي-اق قويۋ كەرەك دەپ اشىنا جازدى.

«مەن سايلاۋدى مۇلدەم وتكىزبەي-اق قويۋعا شاقىرامىن. «نۇر وتان» پارتياسىنىڭ ۇمىتكەرلەرىن تۇگەل دەپۋتات ەتىپ بەكىتە سالايىق. سونىمەن ءىس ءبىتتى. قانشاما ميللياردتى ۇنەمدەپ قالامىز. كەيبىر قىزۋ سايلاۋ كوميسسيالارى سايلاۋدى كەزەكتى فارسقا اينالدىرىپ جاتقانى قىنجىلتادى. «نۇر وتاننىڭ» جەڭەتىنى بارىنە تۇسىنىكتى. ەگەر سايلاۋ دوداسىنا وزگەشە پىكىر ايتقان بولسا، بۇل مەملەكەتكە قاتەر توندىرە مە؟»، - دەيدى ا. شۋرايەۆ.

ورتالىق سايلاۋ كوميسسياسىنىڭ مۇشەسى مارات سارسەمبايەۆ ۇمىتكەرەردىڭ تاپسىرعان سالىق دەكلاراسياسىنداعى كەمشىلىكتەر ونداعى قاتە كورسەتىلگەن قاراجات پەن مۇلىك سوماسىنا قاراماستان نازارعا الىناتىنىن ايتقان.

«جاعداي بىلاي: مەيلى ءبىر تەڭگە، مەيلى ءجۇز تەڭگە، ءتىپتى، مىڭ دوللار ما، مۇنىڭ بارلىعى دەكلاراسيا تاپسىرۋ كەزىندە ەسكەرىلمەسە زاڭ بۇزىشىلىق بولىپ سانالادى»، - دەيدى م. سارسەمبايەۆ.

استاناداعى №17 سايلاۋ وكرۋگى بويىنشا ۇمىتكەر بولعان باقىت سىزدىقوۆا ءوز كانديداتۋراسىنىڭ الىنىپ تاستالۋىن ارانداتۋ دەپ باعالادى.

«مەن مۇنىڭ ارانداتۋ ەكەنىن ءبىلىپ وتىرمىن. مۇنى سالىق دەكلاراسياسىندا مالىمەتتەردى دۇرىس كورسەتپەدىڭ دەپ تۇسىندىرۋدە. بۇلاي بولۋى مۇمكىن ەمەس. مەن سايلاۋعا مۇقيات دايىندالدىم: بىرنەشە فيرمالار-سالىق جونىندەگى كەڭەسشىلەرىم بولدى. ولار مەنىڭ بارلىق دەرەكتەرىمدى تەكسەرىپ، كەڭەس بەردى. سوندىقتان، مەنىڭ سالىق دەكلاراسيامداعى مالىمەتتەردىڭ قاتە بولۋى مۇمكىن ەمەس. ءوزىمنىڭ ءىسىمنىڭ دۇرىس ەكەنىنە تولىق سەنىمدىمىن»، - دەيدى ب. سىزدىقوۆا حانىم.

قازاقتا «تۇيەنى جەل شايقاسا، ەشكىنى كوكتەن كور» دەگەن ماقال بار. ساياسات ساحناسىندا تانىمالدىعى جوعارى، مەملەكەت بيلىگىنە اشىق قارسىلىق تانىتپايتىن باقىت سىزدىقوۆاداي كانديداتتار سىزىلىپ تاستالىپ جاتقاندا، تاۋەلسىز ۇمىتكەرلەردىڭ دەپۋتاتتىقتان دامەلەنۋى شىنىندا دا قيىن جاعداي. ەڭ باستىسى، ماجىلىسكە وتەتىن ۇىتكەرلەردى «ءبىرجاقتى» ەتكەن بيلىك، ەندىگى كەزەكتە وڭىرلەردەگى وكىلەتتى ورگانداردىڭ دەپۋتاتتارىن دا قاتاڭ سۇزگىدەن وتكىزۋگە شىنداپ كىرىسكەنى بەلگىلى بولىپ وتىر. ايتپەسە، كىرىس تۋرالى دەكلاراسيا تولتىرعاندا نەگە تەك ءوزىن-وزى ۇسىنعان ۇمىتكەرلەر عانا قاتەلەسىپ، «نۇر وتان» اتىنان ۇسىنىلعانداردىڭ قۇجاتتارى ءمىنسىز بولادى؟ ال، اقتوبەلىك كانديدات الماز جانتاكەنوۆتى ءسۇرىندىرۋ ءۇشىن كسرو كەزىندەگى ۇلەستىك كۋپونداردىڭ قازبالانۋى «سايلاۋ» اتتى وسى ساياسي كومەديانىڭ كۋلميناسياسى بولدى.

دارحان مۇقانتەگى