كەشە كەشكە تۇركيا استاناسىندا جارىلىس بولىپ، 34 ادام قازا تاپتى،- دەپ حابارلايدى «قامشى» پورتالى.

جارىلىس گۇيۆەن ساياباعىندا، تۇركيا پرەمەر-مينيسترىنىڭ كەڭسەسى ماڭىنداعى اۆتوبۋس ايالداماسىندا بولعان. اۆتوكولىك ىشىندەگى جارىلعىش زاتتىڭ ىسكە قوسىلعان ءساتى بەينەكامەراعا ءتۇسىپ قالعان.

ەلدىڭ دەنساۋلىق ساقتاۋ ءمينيسترى مەحمەت مۇزەنوعلى جارىلىستان قازا تاپقاندار سانى 34 ادامعا جەتكەنىن حابارلادى. بۇعان دەيىن اقپارات قۇرالدارى 27 ادامنىڭ قازا بولىپ، تاعى 75 كىسى جاراقات العانىن حابارلاعان بولاتىن.

«30 ادام وقيعا ورنىندا، ءتورت ادام اۋرۋحانالاردا كوز جۇمدى. قازا تاپقاندار ىشىندە ءبىر نەمەسە ەكى جانكەشتى لاڭكەس بولۋى مۇمكىن. تاعى 125 ادام جاراقات العان، ولار 14 اۋرۋحاناعا جاتقىزىلدى، جارالانعانداردىڭ 19-ى – اۋىر جاراقات العاندار. جەتى ادام وپەراسيا ستولىندا جاتىر»، - دەپ مالىمدەدى دەنساۋلىق ساقتاۋ ءمينيسترى م. مۇزەنوعلى.

الدىن الا تاراتىلعان مالىمەتتەر بويىنشا. جارىلىستى كۇردىستان جۇمىسشى پارتياسى نەمەسە سوعان جاقتاس ۇيىمدار ۇيىمداستىرۋى مۇمكىن ەكەنى ايتىلۋدا. ەل پەرمەرى احمەت ءداۋىت ۇلى وسى ماسەلەگە وراي شۇعىل جيىن وتكىزدى. ال، پرەزحيدەنت ەرەجەپ ەردوعان جارىلىسقا كىنالىلەر قاتاڭ جازالاناتىنىن مالىمدەدى.