رەسەي ساربازدارى قىرىمنىڭ اسكەري بولىمشەلەرىن جاۋلاپ جاتىر. ۋكراينانىڭ بۇقارالىق اقپارات قۇرالدارى حابارلاعانداي، دۇيسەنبى كۇنى ولار تارحانكۋتتا ورنالاسقان اۋە كۇشتەرىنىڭ راديولوكاسيالىق روتاسىن جاۋلاپ الۋعا ارەكەتەنگەن، دەپ حابارلايدى Tengrinews.kz ءتىلشىسى.

اتالعان قۇرىلىم كومانديرىنىڭ ورىنباسارى ۆيتاليي ونيششەنكونىڭ سوزىنە قاراعاندا، ناۋرىزدىڭ 10-ى كۇنى كەشقۇرىم اسكەري بولىمشەنىڭ توسقاۋلى جانىندا مەملەكەتتىك ءنومىرى جوق سەگىز جۇك ماشيناسى توقتادى. سودان 120 رەسەيلىك دەسانت ءتۇسىپ، اسكەري قالاشىقتى قورشاۋعا الدى. ال بولىمشەنىڭ جەكە قۇرامىنا قارۋ-جاراقتى تاپسىرىپ، ءوز ەركىمەن بەرىلۋگە ۇسىنىس جاسالدى. راديولوكاسيالىق روتانىڭ كومانديرى وعان مويىنسۇنعان جوق. بۇدان كەيىن كەلىسسوزدەر باستالدى.

سونداي-اق دۇيسەنبى كۇنى تۇندە شامامەن 200 رەسەيلىك سارباز 14 جۇك ماشيناسىمەن كەلىپ، چەرنومورسك كەنتىندە ورنالاسقان زىمىران-تەحنيكالىق بولىمشەنى جاۋلاپ الدى. بۇل تۋرالى قىرىمنىڭ قورعانىس مينيسترلىگى مەديا-ورتالىعىنىڭ باسشىسى ۆلاديسلاۆ سەلەزنيەۆ فەيسبۋكتاعى ءوزىنىڭ جەكە پاراقشاسىنا جازدى.

بۇدان باسقا، باحچيسارايداعى اسكەري بولىمشە رەسەيلىك ساربازداردىڭ يەلىگىنە ءوتتى. ءقازىر ولار نوۆوفەدوروۆكا اەرودرومىن جاۋلاپ الۋعا تىرىسىپ جاتىر. بۇعان دەيىن ساكاح جانە دجانكوە اەرودرومدارى باعىندىرىلعان بولاتىن. ال، بەلبەك اەرودرومىنىڭ جۇمىسى توقتاتىلدى.