كۇنى كەشە  جۇڭگو  باسشىسى شي ءجينپيڭنىڭ ۋكراينا  ماسەلەسىنە  قاتىستى  بەيتاراپ پوزيسيانى  ۇستاناتىنىن  سايتىمىزدا  جازعان بولاتىنبىز.  الايدا، اراعا  كۇن  سالىپ جۇڭگو مەن رەسەيدىڭ ۋكرايناداعى وقيعالارعا قاتىستى ماسەلەلەردەگى پوزيسيالارى بىردەي بولىپ شىقتى. Who.trades سايتىنىڭ حابارلاۋىنشا، بۇل رەسەي جانە جۇڭگو سىرتقى ىستەر مينيسترلەرى سەرگەي لاۆروۆ پەن ۆان ي اراسىندا تەلەفون ارقىلى بولعان اڭگىمە بارىسىندا بەلگىلى بولعان.

«رەسەي مەن قىتايدىڭ بۇل ەل مەن ونىڭ توڭىرەگىندەگى وقيعالاردان قالىپتاسقان جاعدايلاردىڭ كەڭ اۋقىمىنداعى كوزقاراستارى بىر-بىرىمەن ۇندەس كەلەتىنى اتاپ ءوتىلدى»، – دەپ دايەكتەمە كەلتىردى «گازەتا.Ru». سونىمەن بىرگە، لاۆروۆ پەن ونىڭ قىتايلىق ارىپتەسى الداعى ۋاقىتتا دا ۋكراين ماسەلەسى جونىندە تىعىز قارىم-قاتىناستا بولاتىندارىن مالىمدەگەن.

باتىس ەلدەرىنەن ارتىقشىلىعى، جۇڭگو بۇل ماسەلەدە رەسەيدى قولدايتىنىن بىلدىرگەن. باتىس ەلدەرى رەسەيدى ۇركىتۋگە تىرىساتىندارىن انىق بايقاتىپ وتىر. اقش پرەزيدەنتى باراك وباما ۋكراينانىڭ ىستەرىنە اسكەري ارالاسۋشىلىق جاسار بولسا، حالىقارالىق تالقىعا ءتۇسىپ، ءتيىستى «شىعىنعا» ۇشىرايتىنىن ايتتى. ال «ۇلكەن سەگىزدىكتىڭ» كانادا، فرانسيا، گەرمانيا، يتاليا، جاپونيا،  ۇلىبريتانيا جانە اقش سياقتى مۇشەلەرى سوچيدە وتەتىن G8 سامميتىنە دايىندالۋدان باس تارتاتىندارىن بايانداعان بىرلەسكەن مالىمدەمە قابىلدادى.

ماقسات يسلام