بۇگىن ەلىمىزدە كەزەكتەن تىس پارلامەنت ءماجىلىسى مەن ءماسليحات دەپۋتاتتارىنىڭ سايلاۋى وتۋدە. بارلىعى 9 ملن 791 مىڭ 165 قازاقستاندىق سايلاۋعا قاتىسۋ قۇقىعىنا يە ەكەنى بۇعان دەيىن باسپاسوزدە حابارلاندى. ءماجىلىس سايلاۋىنا التى ساياسي پارتيا قاتىسۋعا ءوتىنىش بەرسە، ءتۇرلى دەڭگەيدەگى ءماسليحات دەپۋتاتتىعىنا 10825 ۇمىتكەر تىركەلگەن.

تاڭ سارىدەن اشىلعان سايلاۋ ۋچاسكەلەرىندە داۋىس بەرۋشىلەر قارقىنى تۇسكە دەيىن وتە جوعارى دەڭگەيدە بولعان. ورتالىق سايلاۋ كوميسسياسى تۇستەن كەيىن، ساعات 16.00-دە سايلاۋشىلاردىڭ 71 پايىزى ءوز تاڭداۋلارىن جاساپ ۇلگەرگەنى حابارلاندى. ساياسي ۇيىمدار مەن كانديداتتاردىڭ، رەسمي ورىنداردىڭ تاراپىنان سايلاۋ بارىسىنا قاتىستى، ونداعى زاڭ بۇزۋشىلىقتار تۋرالى رەسمي مالىمدەمە جاسالماعانىمەن، سايلاۋ ۋچاسكەلەرىنە باس سۇققان جۋرناليستەر مەن قاراپايىم ازاماتتار الەۋمەتتىك جەلىدە ساياسي شارانىڭ زاڭسىزدىقتاردان ادا ەمەستىگىن جازۋدا.

بۇل دەرەكتەرگە قاتىستى باس پروكۋراتۋرا وكىلى نۇرداۋلەت سۇيىندىك تۇسىنىك بەرىپ، رەسمي باقىلاۋشىلار مەن ساياسي ۇيىمدار، ناقتى ۇمىتكەرلەر تاراپىنان شاعىم تۇسپەگەنىن، الەۋمەتتىك جەلىلەردەگى الگىندەي ۆيدەولار مەن جازبالار كوپ جاعدايدا راستالا بەرمەيتىنىن ايتتى.

«ءاربىر سايلاۋ پروسەسى بارىسىندا ءبىز جەلىدەگى مۇنداي حابارلاردى باقىلاپ وتىرامىز. ءبىرىنشى كەزەكتە، سايلاۋ بارىسىن ۇمىتكەرلەر مەن ساياسي پارتيالار وزدەرىنىڭ سەنىمدى وكىلدەرى مەن باقىلاۋشىلارى ارقىلى باقىلايتىنىن ايتا كەتۋ كەرەك. قوعامدىق بىرلەستىكتەر تاراپىنان باقىلاۋ جۇرگىزۋ تەتىكتەرى بار، حالىقارالىق باقىلاۋشىلار بار. ياعني، سايلاۋ بارىسىن باقىلاۋ تەتىكتەرى جەتكىلىكتى دەڭگەيدە رەتتەلگەن جانە زاڭنامالاردا ەنگىزىلگەن. سوندىقتان مۇنداي جاعدايلاردا ءبىز وسى رەسمي تۇلعالاردىڭ شاعىمدارىنا نازار اۋداراتىن بولامىز. بۇگىندە ءبىز استانا جانە كوكشەتاۋ قالالارى بويىنشا سايلاۋ بيۋللەتەندەرىن ءۇشىنشى تۇلعالارعا بەرۋ، ءبىر ادامعا بىرنەشە بيۋللەتەن بەرۋ وقيعاسى بويىنشا ەكى حابارلاما الىپ وتىرمىز. بۇل اقپاراتتى ءقازىر تەكسەرىپ جاتىرمىز»، - دەيدى ول.

سونداي-اق، باس پروكۋراتۋرا وكىلى وقو-داعى ءبىر سايلاۋ ۋچاسكەسىندە ءماسليحات دەپۋتاتتىعىنا ۇمىتكەر ۋچاسكەگە كەلىپ، ءوزىن ورتەپ جىبەرۋگە ارەكەتتەنگەنىن ايتىپ وتىر. قاداعالاۋشى ورگان وكىلى سايلاۋ پروسەسى اياقتالماعاندىقتان، اتالعان وقيعا بويىنشا ازىرگە تولىق اقپارات بەرۋ مۇمكىندىگى جوقتىعىن جەتكىزدى.

الايدا، جۋرناليستەر مەن قوعامدىق بەلسەندىلەر الماتى، اتىراۋ، ورال، تاعى باسقا قالالاردا سايلاۋ تۋرالى زاڭ تالاپتارىنىڭ بۇزىلعانىن، ءبىر سايلاۋشىعا بىرنەشە بيۋللەتەن بەرىلۋ وقيعالارىن راستايتىن ۆيدەولار جاريالاۋدا.

سونداي-اق، ورال قالاسىنداعى №447 سايلاۋ ۋچاسكەسىندە كوللەدج، جوو ستۋدەنتتەرىن وقۋ ورنىنا تىركەۋگە قويىپ، توپتاپ داۋىس بەرگىزۋ وقيعاسى تۋرالى دا ۆيدەو جاريالانىپ وتىر.

سايلاۋشىلاردىڭ داۋىس بەرۋى 20.00 ساعاتقا دەيىن جالعاسادى. وسك بۇگىن ساعات 22.30-دا سايلاۋشىلاردىڭ داۋىس بەرۋى تۋرالى الدىن الا مالىمەتتەردى جاريالاۋى ءتيىس.

جومارت ابدوللا ۇلى